मनाङमा पनि कात्तिक १७ गते उपनिर्वाचन हुने

मेयरसाप डेस्क

काठमाडौं । निर्वाचन आयोगले मनाङ प्रतिनिधि सभा १ को प्रदेश सभा २ मा उपनिर्वाचनको मिति तय गरेको छ ।

आयोगको शुक्रबारको बैठकले कात्तिक १७ गते उपनिर्वाचन गर्ने निर्णय गरेको हो । यस्तै, रुपन्देही ३ को प्रतिनिधि सभा उपचुनाव पनि सोही मितिमा हुने भएको छ ।

२०७९ सालको निर्वाचनमा यस क्षेत्रबाट राजीव गुरुङ (दीपक मनाङे) निर्विरोध निर्वाचित भएका थिए । तर, ज्यान मार्ने उद्योगको मुद्दामा सर्वोच्च अदालतको आदेशसँगै उनी उम्मेदवार बन्न अयोग्य ठहरिएका हुन् ।

सर्वोच्चको संवैधानिक इजलासले २०८१ कात्तिक २० गतेदेखि उनको पद रिक्त भएको निर्णय गरेको थियो ।

उपनिर्वाचनमा भदौ २५ गतेसम्मको मतदाता नामावली प्रयोग गरिने र मतदानको लागि कात्तिक १६ गतेसम्म १८ वर्ष पूरा भएको हुनुपर्ने आयोगले जनाएको छ । 

आयोगले स्वच्छ, निष्पक्ष र स्वतन्त्र निर्वाचनका लागि सबै सरोकारवाला निकायसँग सहकार्य र सहयोगको आह्वान गरेको छ ।