रामहरि खतिवडाले पाए संसदीय सुनुवाइ समितिको जिम्मेवारी

मेयरसाप डेस्क

काठमाडौं । राज्य व्यवस्था तथा सुशासन समितिका पूर्वसभापति रामहरि खतिवडा संसदीय सुनुवाइ समिति (संयुक्त) मा नियुक्त भएका छन् ।

प्रतिनिधिसभाको शुक्रबारको बैठकमा उपसभामुख इन्दिरा रानामगरले खतिवडालाई समितिमा पठाउन गरेको प्रस्ताव सर्वसम्मतिले स्वीकृत भएको हो ।

संसदीय सुनुवाइ समितिकी सभापति ईश्वरीदेवी न्यौपानेले राजीनामा दिएर राज्य व्यवस्था समितिको सभापतिमा निर्वाचित भएपछि उक्त पद रिक्त थियो ।

रिक्त स्थानमा खतिवडालाई ल्याउन कांग्रेस प्रमुख सचेतक श्यामकुमार घिमिरेले सिफारिस गरेका थिए ।

सांसद खतिवडाले गत साउन २८ गते संघीय निजामती सेवा विधेयकमा ’कुलिङ अफ पिरियड’ सम्बन्धी व्यवस्थामा छेडखानी भएको घटनामा छानबिन गर्न गठित संसदीय विशेष छानबिन समितिले नैतिक जिम्मेवार ठह¥याएपछि आफ्नो पदबाट राजीनामा दिएका थिए ।