आईएईएसँगको सहकार्यमा इरान सकारात्मक, सम्झौता नजिक

मेयरसाप डेस्क

तेहरान । इरानका विदेशमन्त्री सेयद अब्बास अराघचीले शनिबार आयोजित एक कार्यक्रममा इरान र अन्तर्राष्ट्रिय आणविक ऊर्जा संस्था (आईएईए) बीच नयाँ सहकार्य रूपरेखा निर्माण गर्ने विषयमा सकारात्मक र सार्थक छलफलहरू भईरहेका जानकारी दिएका छन् । उनले भने, “हामीले आशाजनक वार्ता गरेका छौं र सहकार्यका नयाँ आधार तयार पार्नका लागि धेरै बाँकी छैन ।”

अराघचीले थप भने, “हाम्रो लागि यस्तो सहकार्य महत्त्वपूर्ण छ जसले राष्ट्रिय स्वाधीनता र संसदद्वारा पारित कानुनी मापदण्डहरूलाई सम्मान गर्नेछ ।” संयुक्त राज्य अमेरिकासँग सम्भावित वार्ताको विषयमा उनले भने, “मध्यस्थमार्फत सन्देशहरूको विनिमय भइरहेको छ । जबसम्म अमेरिकाले आपसी सम्मान र साझा हितमा आधारित वार्ताका लागि तयार रहेको देखाउँछ, हामी पनि वार्ता सुरु गर्न तयार हुनेछौं ।”

इरान र अमेरिकाबीच वार्ता पूर्व निर्धारित मितिमा ओमानमा हुन लागेको थियो, तर इजराइलको हवाई आक्रमणपछि त्यो स्थगित भएको थियो । पछि अमेरिकाले पनि इरानका आणविक स्थलहरूमा आक्रमण गरेको थियो ।

यस घटनाको प्रत्युत्तर स्वरूप, इरानी संसदले अन्तर्राष्ट्रिय आणविक ऊर्जा संस्थासँगको सहकार्य अस्थायी रूपमा रोक्ने निर्णय गरेको छ । कानुन अनुसार, राष्ट्रिय सुरक्षा सर्वोच्च परिषद्ले स्थलहरूको सुरक्षा र स्वाधीनताको पूर्ण सम्मान सुनिश्चित नगरेसम्म निरीक्षण अनुमति प्रदान नगर्ने व्यवस्था गरिएको छ ।