ट्रम्पको उपस्थितिमा थाइल्यान्ड–कम्बोडियाबीच युद्धविराम सम्झौता

मेयरसाप डेस्क

एजेन्सी । दक्षिणपूर्वी एसियाली राष्ट्रहरूको सङ्घ (आसियान) शिखर सम्मेलनको अवसरमा अमेरिकी राष्ट्रपति डोनाल्ड ट्रम्पको उपस्थितिमा थाइल्यान्ड र कम्बोडियाले विस्तारित युद्धविराम सम्झौतामा हस्ताक्षर गरेका छन् ।

अमेरिकी आर्थिक प्रतिबन्धको चेतावनी पछि सीमामा भएको भीषण झडप रोक्न दुवै देश सहमत भएका थिए ।

सम्झौताअनुसार थाइल्यान्डले कैदीहरूलाई मुक्त गर्नेछ भने कम्बोडियाले आफ्नो भारी तोपखाना फिर्ता लैजानेछ । कम्बोडियाका प्रधानमन्त्री हुन मानेटले यसलाई ’ऐतिहासिक दिन’ भन्दै स्वागत गरेका छन् ।

ट्रम्पको यो एसिया भ्रमणलाई अन्तर्राष्ट्रिय सम्झौता निर्माताको छवि बलियो बनाउने अवसरका रूपमा हेरिएको छ ।

नोम पेन्हस्थित एक थिङ्क ट्याङ्कका अनुसार, ट्रम्पको ’करको कार्ड’ निर्णायक साबित भयो, जसले उहाँलाई नोबेल शान्ति पुरस्कारका दावेदारका रूपमा समेत स्थापित गर्न सक्छ ।

ट्रम्पले यस क्रममा जापान, दक्षिण कोरिया र मलेसियासँग व्यापार तथा चीनसँगको व्यापार सम्बन्धबारे पनि छलफल गर्ने अपेक्षा गरिएको छ ।