कटहरिया नगरपालिकाका १७० कर्मचारीले तीन वर्षदेखि पाएका छैनन् तलब, लगाए कार्यालयमा ताला

पालिकासहित दसवटै वडा कार्यालयमा ताला

मेयरसाप डेस्क

रौतहट। रौतहटको कटहरिया नगरपालिकाका कर्मचारीले तीन वर्षदेखि तलब नपाएको भन्दै कार्यालयमा तालाबन्दी गरेका छन् । दैनिक ज्यालादारीमा भर्ना भएका झन्डै १७० कर्मचारीले तीन वर्षदेखि तलब नपाएको भन्दै पालिकासहित दसवटै वडा कार्यालयमा ताला लगाएका हुन् । 

लामो समयदेखि तलब निकासा नगरेको भन्दै आक्रोशित बनेका उनीहरुले कात्तिक १२ गते देखि तालाबन्दी गरेका हुन् । 

समस्या समाधान हुनुको साटो बल्झिन थालेपछि प्रमुख प्रशासकीय अधिकृत गणेश नेपालीले भने जिल्ला नै छाडेका छन् । उनी अहिले बिदा लिएर काठमाडौंमा बसेका छन् ।

तालाबन्दीपछि कार्यालयका सम्पूर्ण कामकाज ठप्प हुँदा नगरबासीका दैनिक कामकाग समेत रोकिएको छ । 

ताला लगाउने कर्मचारीहरुले तलब नपाएसम्म ताला नखोल्ने अडान लिँदै आएका छन् । नगर प्रमुख अजय प्रकाश जयसवालले ज्यालादारीका कर्मचारीले तलब पाउनुपर्छ भन्ने पक्षमा आफू पनि रहेको बताए । उनले समस्या समाधान गरेर चाँडै कार्यालय खुलाउने बताएका छन् ।