परम्परागत शैलीले मुलुकको संकट टर्दैन : प्रचण्ड
मेयरसाप डेस्क
|
२०८२ पुष २९ गते १७:००
काठमाडौं । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले देश असाधारण परिस्थितिबाट गुज्रिरहेको भन्दै पुरानो राजनीतिक संस्कारले मात्रै वर्तमान चुनौतीको सामना गर्न नसकिने बताएका छन् ।
मंगलबार पेरिसडाँडामा आयोजित केन्द्रीय सदस्यहरूको शपथ ग्रहण समारोहलाई सम्बोधन गर्दै उनले नयाँ विचार, कार्यक्रम र पहलकदमीको आवश्यकता औँल्याएका हुन् ।
प्रचण्डले विगतका कमजोरीहरूबारे सबै राजनीतिक दलहरूले निर्मम आत्मसमीक्षा गर्नुपर्ने बताए । ‘हामीले आफ्नो भागमा परेका कमजोरीको समीक्षा गरिसक्यौँ र आफूलाई रूपान्तरण गर्ने संकल्प लिएका छौँ,’ उनले भने ।
राष्ट्रिय एकता र स्वाधीनतालाई मजबुत बनाउनकै लागि नयाँ संकल्पसहित पार्टी एकता प्रक्रिया अगाडि बढाइएको उनको दाबी छ । चल्ते–चलाते ढङ्गले अब देश चल्न नसक्ने भन्दै उनले पार्टीका नेताहरूलाई रूपान्तरित हुन निर्देशन समेत दिए ।
Facebook Comments