बान्नीगढी जयगढ गाउँपालिकामा ‘मर्यादित महिनावारी गाउँ अभियान’ सञ्चालन

महिनावारीका समयमा महिलामाथि हुने विभेद न्युनिकरण गर्ने उद्देश्य

मेयरसाप डेस्क

अछाम। अछामको बान्नीगढी जयगढ गाउँपालिकामा ‘मर्यादित महिनावारी गाउँ अभियान’ परियोजना सुरु गरिएको छ। महिनावारीका समयमा हुने विभेद न्युनिकरण गर्ने उद्देश्यले गाउँपालिकाका वडा नम्बर  ३, ४ र ५  मा परियोजना सञ्चालन गर्न लागिएको हो । 

एम्प्लीफाइ चेन्जको आर्थिक सहयोग तथा राइज अप फाउण्डेसन नेपालमार्फत सञ्चालन गर्न लागिएको परियोजनाको सोमबार एक औपचारिक कार्यक्रमकाबीच उद्घाटन गरिएको छ । 

कार्यक्रममा बोल्दै गाउँपालिका अध्यक्ष टेकबहादुर साउँदले बान्नीगढी गाउँपालिकालाई परियोजना कार्यान्वयनका लागि छनोट गरिएकोमा धन्यवाद व्यक्त गरे । उनले परियोजना सफल कार्यान्वयनका लागि गाउँपालिकाको तर्फबाट आवश्यक सहयोग गर्ने प्रतिबद्धता समेत जनाए। महिनावारीसँग जोडिएका विभेद र गलत अभ्यासका कारण सुदूरपश्चिम प्रदेश तथा अछाम जिल्ला बदनाम हुँदै आएकोप्रति दुःख व्यक्त गर्दै उनले यो परियोजनाले महिनावारी विभेद अन्त्य गर्न महत्वपूर्ण भूमिका खेल्ने विश्वास व्यक्त गरे।