स्वास्थ्य बिमाको ३ करोड भुक्तानी नपाउँदा पर्वत अस्पताल संकटमा

तलब खुवाउनै धौ-धौ, सेवा नै प्रभावित हुने डर

मेयरसाप डेस्क

पर्वत । स्वास्थ्य बिमावापतको ठुलो रकम भुक्तानी नपाउँदा पर्वत जिल्लाको एक मात्र सुविधासम्पन्न प्रदेश अस्पताल सङ्कटमा परेको छ । 

सरकारबाट गत आर्थिक वर्षदेखिको स्वास्थ्य बिमा र डायलायसिसवापतको ३ करोड रुपैयाँभन्दा बढी रकम नपाएपछि अस्पतालको दैनिक कार्य सञ्चालनमै समस्या देखिएको हो ।

अस्पतालका प्रमुख मेडिकल सुपरिटेन्डेन्ट डा. ढुण्डीराज पौडेलका अनुसार, रकम अभावमा औषधि र उपकरण खरिद, कर्मचारीको तलब भत्ता तथा ल्याब सेवा व्यवस्थापन गर्न कठिन भइरहेको छ ।

‘बिमा गरेका बिरामीलाई सेवा त दिनैपर्छ, तर सरकारले भुक्तानी नदिँदा औषधि खरिद प्रक्रिया नै अवरुद्ध भएको छ,’ डा. पौडेलले भने । हालसम्म अस्पतालले आन्तरिक कोषबाट जेनतेन खर्च चलाउँदै आए पनि अब भने अवस्था नियन्त्रण बाहिर जान थालेको उनको भनाइ छ ।

पर्वतका झन्डै ४५ प्रतिशत नागरिक स्वास्थ्य बिमामा आबद्ध छन् । अस्पताल व्यवस्थापन समितिका अध्यक्ष याबहादुर परियारले बिल भर्पाइ पठाइसक्दा पनि मन्त्रालयबाट रकम निकासा नहुनु दुःखद भएको बताए । 

केही दिनअघि मात्रै अस्पताल निरीक्षणमा पुग्नुभएकी स्वास्थ्य तथा जनसङ्ख्यामन्त्री डा. सुधा गौतमलाई यसबारे ज्ञापनपत्र बुझाइएको थियो । 

जवाफमा मन्त्री गौतमले देशभरकै अस्पतालमा यस्तो समस्या रहेको र सरकारले बजेट व्यवस्थापनका लागि स्रोत खोजिरहेको जानकारी दिएकी थिइन् ।