बैतडीको मेलौली नगरपालिकाको काँडा बजारका बासिन्दाहरु साउनको दिनमा समेत एक जर्किन पानी भर्नका लागि चार दिनसम्म पालो कुर्न बाध्य भएका छन ।

बर्खाको बेलामा समेत पानीको मुहान सुक्दा मेलौली नगरपालिका काँडा बजारका प्राथमिक स्वास्थ्य केन्द्र, आयुर्वेदिक औषधालय, मणिलेक नमुना मावि र मेलौली बहुमुखी क्याम्पसलगायत काकाकुल बनेका छन् ।

मेलौली नगरपालिका, शिवनाथ गाउँपालिका र पञ्चेश्वर गाउँपालिकासम्मका बिरामीको उपचार सेवा प्रदान गर्दै आएको  प्राथमिक स्वास्थ्य केन्द्रमा पानी नहुँदा प्रसूति सेवा दिन गाह्रो भइरहेको केशरपुर प्राथमिक स्वास्थ्य केन्द्रका स्वास्थ्यकर्मी सन्जिन केसीले जानकारी दिए । प्रधानाध्यापक भीमसिंह धामीका अनुसार एक हजारभन्दा बढी विद्यार्थी अध्ययनरत रहेको मणिलेक नमुना माविमा पानीको समस्याले शौचालय बन्द गर्नुपर्ने अवस्था आएकोे छ ।