हिमालपारिको जिल्ला मुस्ताङमा आन्तरिक तथा बाह्य पर्यटक भित्र्याउनुका साथै आफ्नो संस्कृतिको जगेर्नाका लागि खेलकुद मेला सुरु भएको छ ।

मुस्ताङको घरपझोङ गाउँपालिका–३, स्याङगाउँमा शनिबारदेखि सुरु भएको खिल्हा पर्वका अवसरमा खेलकुद मेला समेत सञ्चालन गरिएको हो । खिल्हा पर्व अवधिमा गाउँभित्र परम्परागत प्रचलनअनुसार याकनाच र जोगी नाचहरू देखाइने चलन रहेको जिल्ला समन्वय समिति मुस्ताङका उपप्रमुख आइतेलाल थकालीले बताए ।  उनले स्याउँगाउँको धार्मिक तथा सांस्कृतिक पर्व खिल्हा पर्वलाई गाउँले मिलेर पर्यटन प्रवर्धनलाई थप टेवा पुग्नेगरी यस पटक बृहत् खेलकुद मेला सञ्चालन गरिएको जनाए ।

परम्परागत रूपमा गाउँले मात्र मिलेर मनाइने खिल्हा पर्वलाई यस पटक स्याउगाउँले विभिन्न खेलकुदका कार्यक्रम सञ्चालन गरिरहेको छ । यस पटक खुल्ला भलिबल प्रतियोगिता, खुल्ला आर्चरी प्रतियोगिता, स्थानीय तारा खेल प्रतियोगिता, घोडा दौडलगायतका खेलकुदका गतिविधि पनि समेटिएको थकालीको भनाइ छ ।

शनिबार साउन ५ गतेदेखि सुरु भएको खेलकुद गतिविधि साउन ९ गतेसम्म सञ्चालन हुने छ ।