सिराहाको धनगढीमाई नगरपालिका– १३ भोेर्लेनीमा दलित समुदायका विपन्न किसानलाई फलफूलका बिरुवा र किसान कार्ड वितरण गरिएको छ ।

धनगढीमाई– १३ का वडाध्यक्ष सूर्यमान तामाङले स्थानीय २२ जना दलित समुदायका विपन्नलाई किसान कार्डसहित दुईवटा रोबर प्रजातिको केरा, एक–एकवटा लिची र कागतीको बिरुवा र स्प्रेयर, टमाटर, झिँगनी, खुर्सानी, भन्टा, रायोको सागको बिउ तथा दुई–दुई सय लिटर क्षमताको दुई थान ड्रम वितरण गरे ।

राष्ट्रिय कृषक समूह महासंघ, केयर नेपालको साझेदारीमा सञ्चालित पोषण बगैँचा कार्यक्रमअन्तर्गत दलित समुदायका विपन्न किसानलाई आफ्नै करेसाबारीमा विषादीरहित पोषणयुक्त सागसब्जी र तरकारी उब्जाएर पोषणमा पहुँच पुर्‍याउन फलफूल र सागसब्जीको बिउ बाँडिएको कार्यक्रम संयोजक दिलीप साहले जानकारी दिए । स्थानीय विपन्न दलित महिलाहरू आबद्ध रहेको सरस्वती महिला कृषक समूहका महिलाको लहानस्थित नेपाल इन्भेस्टमेन्ट मेगा बैंक लिमिटेडसँगको सहकार्यमा कार्यक्रमअन्तर्गत दिइने सहयोग रकमको बैंकिङ कारोबारका लागि किसान कार्ड बाँडिएको बताए ।

भोर्लेनीका विपन्न दलित महिला किसानहरूलाई हरेकको बैंक खातामा दाखिला गरिएको १४ हजार पाँच सय रुपैयाँमध्ये मंगलबार पहिलो चरणमा आठ हजार रुपैयाँबराबरको बिउ, फलफूलका बिरुवासहित स्प्रेयर र ड्रम सामग्री बाँडिएको र बाँकी रकमबराबरको सामग्री दोस्रो चरणमा वितरण गरिने महासंघले जनाएको छ ।

महासंघका अनुसार धनगढीमाईको १४ मध्ये १ देखि १३ नम्बर वडा क्षेत्रका विशेषगरी दलित समुदायका विपन्न किसानको २७ समूहमा पोषण बगैँचा र निम्नमध्यम वर्गीय आर्थिक अवस्थाका किसानआबद्ध ५७ वटा समूहका लागि कृषक पाठशाला सञ्चालन भइरहेको छ ।