महोत्तरीको मनरा शिसवा नगरपालिकाले स्वास्थ्य सेवामा सहज पहुँचका लागि ‘घर घरमा डाक्टर’ अभियान सञ्चालन गरेको छ ।

नगरपालिकाले प्रत्येक वडामा स्वास्थ्यकर्मी परिचालित गरी जनताको घरमै सेवा पुर्याउन ‘घरदैलो सामुदायिक स्वास्थ्य कार्यक्रम’ सञ्चालमा ल्याएको हो । स्वास्थ्य सेवालाई प्राथमिकतामा राखेको मनरासिसवाले १२ औँ नगर सभाबाट स्वीकृत कार्यक्रम अनुसार प्रत्येक वडाको घरदैलोमै स्वास्थ्य सेवा विस्तार गरेको नगरप्रमुख मोहन पाण्डेयले बताए । पहिलो महिनामै जनतामा सन्तुष्टि र पृष्ठपोषण राम्रो पाइएकाले यो सेवाले नगरको स्वास्थ्य क्षेत्रमा अनुकूल प्रभाव पार्ने सङ्केत गरेको नगरप्रमुख पाण्डेयको भनाइ छ ।

भौगोलिक अवस्थितिको हिसाबले भारतको विहारसँग दक्षिणी सीमा जोडिएको मनरासिसवाको जनघनत्व सबैभन्दा बढी छ । १० वटा वडा भएको यस नगरपालिकाको जनसङ्ख्या ५२ हजार छ । यहाँ एक आधारभूत नगर अस्पताल, छ वटा वडामा स्वास्थ्य चौकी र तीन वडामा आधारभूत स्वास्थ्य सेवा छन् । सबै स्वास्थ्य संस्थामा गरी एक जना मेडिकल अफिसरसहित ८० जना स्वास्थ्यकर्मी कार्यरत छन् ।

‘घर घरमा डाक्टर’ कार्यक्रम अन्तर्गत हरेक वडामा महिला र पुरुष गरी कम्तीमा दुई जना स्वास्थ्यकर्मी खटाइने व्यवस्था मिलाइएको छ । नगरपालिकाका स्वास्थ्य शाखा प्रमुख रामचन्द्र यादवका अनुसार नगरपालिकाको ग्रामीण भेगका अधिकांश बासिन्दा आफ्नो स्वास्थ्यप्रति खासै संवेदनशील देखिँदैनन् । व्यथा लुकाउने र रोगलाई नियति ठान्ने प्रवृत्ति सबैभन्दा ठुलो समस्या छ ।

सामुदायिक स्वास्थ्य कार्यक्रम अन्तर्गत घरदैलोमै पुगेका स्वास्थ्यकर्मीले सामान्य जाँचका साथै सुगर, प्रेसर, गर्भवती जाँच, परिवार नियोजनलगायत स्वास्थ्य परामर्श दिने गरेका छन् ।