काठमाडौँ । नेपाली कांग्रेसले हालै सम्पन्न स्थानीय तह उपनिर्वाचनको परिणाम सन्तोषक रहेको निष्कर्ष निकालेको छ ।

एक साताअघि सम्पन्न स्थानीय तह उपनिर्वाचनमा केही प्रमुख पद गुमाएको कांग्रेसको सोमबार बसेको केन्द्रीय कार्यसम्पादन समिति बैठकले उपनिर्वाचनको परिणाम सन्तोषजनक रहेको निष्कर्ष निकालेको हो ।

पार्टी सभापति शेरबहादुर देउवाको निवास बूढानीलकण्ठमा बसेको केन्द्रीय कार्यासम्पादन समितिको बैठकले उपनिर्वाचनको परिणामलाई सन्तोषजनक रहेको निष्कर्ष निकालेको पार्टी प्रवक्ता डा. प्रकाशशरण महतले जानकारी दिए ।

ठूलो पार्टीको रुपमा स्थापित भएको र केही महत्त्वपूर्ण स्थानमा जित हासिल गरेको भन्दै प्रवक्ता महतले भने, ‘हामी अहिले पनि ठूलो पार्टीका रूपमा स्थापित भएका छौँ । महत्त्वपूर्ण ठाउँहरूमा हामीले जितेका छौँ । र, यो परिणामलाई हामीले सन्तोषजनक ठानेका छौँ ।’

यही मंसिर १६ गते ४४ पदका लागि भएको स्थानीय तह उपनिर्वाचनमा कांग्रेसले पालिका प्रमुख २, पालिका उपप्रमुख ३ र वडाध्यक्ष दुई पद गुमाएर पालिका प्रमुख १, वडाध्यक्ष १६ र जिसस प्रमुख २ पदमा निर्वाचित भएको थियो ।