रसुवा । रसुवाको स्याफ्रुबेँसीमा आयोजना गरिएको एक दिवसीय निःशुल्क स्वास्थ्य शिविरमा एक सय पाँच महिलाको पाठेघर परीक्षण गरिएको छ । लाङटाङ लिरूङ अस्पतालद्वारा आयोजित शिविरमा १२ जनामा पोजेटिभ भेटिएको डा .जीवन तामाङले बताए ।

समस्या देखिएका बिरामीलाई आवश्यक परामर्श दिन थालिएको र स्थानीयस्तरमा उपचार हुन नसक्नेलाई जोखिमको अवस्था हेरी  बाहिर पठाउन तयार भइरहेको उनले बताए । परीक्षणका लागि स्त्रीरोग विषेशज्ञ डा पुनम लामा खटिएका थिए ।

ग्रामीणवासीलाई लक्षित गरी सञ्चालन गरिएको अस्पतालले हालसम्म एक हजार पाँच सय भन्दाबढीलाई उपचार सेवा प्रदान गरिसकेको डा. तामाङले बताए ।

आफूलाई परेको समस्या खुलस्त रूपमा नभन्ने र लाज मानेर अस्पताल नजाने गरेको पाइएकाले महिला चिकित्सकबाटै परामर्श सहितको उपचारसेवा दिने गरिएको अस्पतालले बताएको छ । आफ्नो स्वास्थ्यप्रति सजक रही स्वास्थ्य संस्थामा जान सुझाबसमेत दिँदै आएको छ ।