चितवन । भरतपुर महानगरपालिकामा अवैध रुपमा क्रसर उद्योग चलाउन दिएको विषयमा कार्यपालिकामा मेयर रेणु दाहालको ‘कनेक्सन’बारे प्रश्न उठेको छ ।

आज बसेको कार्यपालिका बैठकमा भरतपुर महानगरपालिकाका कार्यपालिका सदस्य तथा वडा नम्बर १ का अध्यक्ष केशव महर्जनले ६ महिनादेखि अवैध रुपमा क्रसर उद्योग सञ्चालन गर्न दिएको विषयमा प्रश्न उठाएका थिए । 

वडा नम्बर १ मा महानगरपालिकाले राजी कन्ट्रक्सन एण्ड सप्लायर्स प्रालिलाई गएको एक वर्ष अघि ६ महिनाका लागि सञ्चालनको अस्थायी इजाजत दिइएको थियो ।

भरतपुर महानगरपालिकाको ०८० भदौ २९ गतेको नगर कार्यपालिकाको निर्णय तथा भरतपुर महानगरको ०८० माघ २४ को निर्णयअनुसार बढीमा ६ महिना महानगरभित्रका विकास निर्माणका काम गर्न राजी कन्ट्रक्सनलाई अस्थायी सञ्चालनको अनुमति ०८० फागुन ६ गते दिइएको देखिन्छ । तर एक वर्ष बितिसक्दा पनि उक्त कन्ट्रक्सनले पालिकाका नदीहरुबाट नदीजन्य सामाग्रीहरु उत्खनन् गरी प्रयोग गरिरहेको छ । तर यस विषयमा मेयर रेणु दाहाल मौन देखिन्छिन् । 

महानगरपालिकाले उक्त कन्ट्रक्सनको काम रोकेको पनि छैन र नगर कार्यपालिकाबाट कुनै निर्णय पनि गराएको छैन । मेयर रेणु दाहालसँग सम्बन्ध बनाएर कन्ट्रक्सनका मालिकले राज्यको दोहान गरिरहेको वडा अध्यक्ष महर्जनले नगर कार्यपालिका बैठकमा प्रश्न उठाउँदा मेयर रेणु चूप बसेको स्रोत बताउँछ । उनको मौनताले उक्त कन्ट्रक्सनसँग मेयर रेणुको आर्थिक लेनदेनको ‘कनेक्सन’ हुनसक्ने आशंका बढेको छ ।

महानगरपालिकाले गएको ४ गते उक्त क्रसर बन्द गरी क्रसर सञ्चालन भएदेखि अहिलेसम्मको मासिक विवरण बुझाउन पत्र काटेको पनि देखिन्छ । तर त्यसको भोलिपल्ट पनि उक्त कन्ट्रक्सनले गिट्टी बालुवाहरु बेचेको बील नै सार्वजनिक भएको छ । त्यो पनि महानगरपालिकाको विकास निर्माणका कामभन्दा बाहिर उक्त कन्ट्रक्सनले खुल्ला रुपमा नदीजन्य सामाग्री बेचिरहेको भेटिन्छ ।

अहिले पनि उक्त क्रसर निर्वाध रुपमा चलिरहेको छ । महानगरपालिकाले पहिला अस्थायी रुपमा ६ महिनाका लागि महानगरभित्रका सबै तहका विकास निर्माणमा मात्रै निर्माण सामाग्री उपलब्ध गराउने गरी क्रसर सञ्चालनको अनुमति दिएको देखिन्छ । तर अहिले उक्त क्रसरले महानगरका आयोजना भन्दा बाहिरका आयोजनामा पनि नदीजन्य सामाग्री बेचिरहेको छ ।
 

मेयर रेणु मौन रहनु, जिल्ला प्रशासनले कुनै कार्बाही अगाडि बढाउन नसक्नु र क्रसर निर्वाध रुपमा अहिले पनि सञ्चालन हुन र महानगरमा कुनै बील बीजक नबुझाउनुले मेयर रेणुको क्रसर उद्योगसँग ‘लाभ’को सम्बन्ध हुनसक्ने आशंका गर्ने प्रशस्त ठाउँ देखिन्छ । यो क्रसर भरतपुर महानगरको वडा नम्बर १ मा रहेको ठिमुरामा सञ्चालन भइरहेको छ ।