काठमाडोँ । स्वास्थ्य तथा जनसंख्या मन्त्रालयले फागुन महिनालाई नसर्ने रोग पहिचान अभियानका रुपमा मनाइरहेको छ ।

मन्त्रालयले यसअन्तरगत मधुमेह, उच्च रक्तचाप, मृगौला सम्वन्धी रोग, शहरिरको उचाइ र तौलको अनुपात जस्ता नसर्ने रोगको पहिचान गर्ने भन्दै अभियान थाल्यो ।
 

सरकारले यो अभियान अत्यधिक भीडभाड हुने गाउँ नगरपालिकाको कार्यालय, विदालय, हाट बजार, वडा कार्यालय आदिलाई लक्षित गरेर संचालन गर्ने भनेर घोषणा पनि गर्यो ।

तर रमाइलो कहाँ छ भने १ फागुबाट अभियान सुरु गरेको सरकारले यो अभियानमा साथ दिनुपर्ने स्थानीय तहलहरुलाई भने बल्ल २५ फागुनमा सम्झियो ।
 

स्वास्थ्य तथा जनसंख्या मन्त्रालयले २५ फागुनमा नसर्ने रोग पहिचानको अभियान चलिरहेको भन्दै संघीय मामिला तथा सामान्य प्रशासन मन्त्रालयमार्फत देशभरका सबै स्थानीय तहमा पत्राचार गरी यो अभियानमा सहयोग गर्न अपील गरेको छ ।

मन्त्रालयले सबै स्थानीय तहमा नसर्ने रोग पहिचानका लागि हेल्थ डेस्क राख्न भनेको छ । तर अभियानको महिना सकिन ५ दिन हुँदा संघीय मामिला मन्त्रालयमार्फत स्थानीय तहलाई गरेको यो अपील निष्प्रभावी बनेको छ ।
 

कुनै पनि स्थानीय तहले यो अभियान सफल पार्न भनेर हेल्थ डेस्क नराखेको संघीय मामिला कै अधिकारीहरु बताउँछन् ।

स्वास्थ्य मन्त्रालयले अभियान सकिन ५ दिन बाँकी हुँदा पत्राचार गरेपछि यसका लागि स्थानीय सरकार र मातहतका निकायले तयारी नै गर्न नभ्याएको मन्त्रालय र सम्वन्धित स्थानीय तहहरुको भनाइ छ ।