रुस कुनै पनि युद्धविराम अघि ‘बलियो स्थिति’ हासिल गर्न चाहन्छ : जेलेन्स्की

मेयरसाप सम्पादकीय

किएभ । युक्रेनका राष्ट्रपति भोलोदिमर जेलेन्स्कीले शनिबार रुसले युक्रेनमा युद्धविराम गर्नुअघि सैन्य रूपमा ‘बलियो स्थिति’ हासिल गर्न चाहेको बताएका छन् । यस हप्ताको सुरुमा संयुक्त राज्य अमेरिकाले प्रस्ताव गरेको ३० दिने युद्धविराममा रुस तुरुन्तै सहमत भएन किनकी रुसी राष्ट्रपति भ्लादिमिर पुटिनले पहलको बारेमा प्रश्न उठाएका छन् । 
 

“उनीहरू युद्धविराम अघि बलियो स्थिति चाहन्छन्”, जेलेन्स्कीले किएभमा एक पत्रकार सम्मेलनमा भने, “मलाई लाग्छ प्रक्रियाको ढिलाइ मैले भनेको कुराकै कारणले हो । उनीहरू युद्धक्षेत्रमा आफ्नो स्थिति सुधार गर्न चाहन्छन् ।”

युक्रेनमा आक्रमण गरेको तीन वर्षपछि रुसले मोर्चाका धेरै क्षेत्रमा गति लिएपछि युद्धविरामको प्रस्ताव आएको हो । मस्कोले रुसको कुर्स्क क्षेत्रका भागहरूबाट युक्रेनी सेनालाई पनि हटाएको छ । त्यहाँ युक्रेनले गत गर्मीमा आश्चर्यजनक आक्रमण गरेको थियो ।

जेलेन्स्कीले युद्धविराममा सहमत नभएर पुटिन ट्रम्पको विरुद्ध पनि जाँदै गरेको भन्दै मस्कोमाथि युद्ध समाप्त नगर्ने तरिकाहरू खोज्ने प्रयास गरेको आरोप लगाए । अमेरिकी राष्ट्रपति डोनाल्ड ट्रम्पले रुसबारे केही मैत्रीपूर्ण बयान दिएका छन् । 

“आज पुटिन ट्रम्पको प्रस्तावसँग सहमत नहुने व्यक्ति हुनुहुन्छ”, उनले भने । उनले ३० दिनको युद्धविरामले दीर्घकालीन शान्तिमा वार्तालाई अनुमति दिने बताए । यद्यपि उनले कुनै पनि क्षेत्र रुसलाई दिने कुरा अस्वीकार गरे ।

“संयुक्त राज्य अमेरिकाले जेद्दामा भएको बैठकमा यो मुद्दा उठाएको थियो । उनीहरूले युक्रेनी स्थिति प्राप्त गरे”, साउदी अरबमा अमेरिका र युक्रेनी टोलीहरू बीचको वार्तालाई उल्लेख गर्दै जेलेन्स्कीले भने, “हाम्रो स्थिति यो हो कि हामीले कब्जा गरिएका युक्रेनी क्षेत्रहरूलाई कुनै पनि अवस्थामा रूसी भनेर मान्यता दिँदैनौँ ।”

जेलेन्स्कीले क्षेत्रहरूको मुद्दा जटिल भएको र ‘वार्ताको टेबलमा पछि समाधान गर्नुपर्ने’ बताए । रुसले दक्षिणी र पूर्वी युक्रेनको ठूलो भाग कब्जा गरेको छ । मस्कोले चार युक्रेनी क्षेत्र पूर्ण रूपमा नियन्त्रण नगरेको भए पनि कब्जा गरेको दाबी गरेको छ ।