जेठ १५ गतेदेखि अनिश्चितकालीन जनआन्दोलन गर्ने राजावादीको घोषणा
Mayorsap | २ हप्ता अगाडि 
काठमाडौं। राजसंस्था पुनर्स्थापनका लागि गठित समितिले आगामी जेठ १५ गतेदेखि अनिश्चितकालीन जनआन्दोलनको घोषणा गरेको छ । समितिका संयोजक नवराज सुवेदीले बिहीबार राजधानीमा पत्रकार सम्मेलन गर्दै जनआन्दोलन घोषणा गरेका हुन् ।
पत्रकार सम्मेलनमा सुवेदीले जनआन्दोलनमा राप्रपा, राप्रपा नेपाल, राष्ट्रिय शक्ति नेपाल, नेपाली कांग्रेस (बिपी), शिव सेनालगायतको साथ रहेको जानकारी दिए । उनले आन्दोलन शान्तिपूर्ण हुने, भद्र अवज्ञा र सत्याग्रह आन्दोलनको स्वरुप हुने समेत जानकारी दिएका छन् ।
आन्दोलन व्यवस्था परिवर्तनका लागि भएको र यसमा सरकार वा सत्तामा रहेका दलहरूको विरोध नगर्ने उनको भनाइ छ । सुवेदीले जनआन्दोलनको बलमा उन्नत र प्रजातान्त्रिक प्रणाली स्थापित गर्ने दाबी समेत गरेका छन्। संवैधानिक राजसंस्थासहितको प्रजातन्त्र, हिन्दुराष्ट्र स्थापना, केन्द्र र स्थानीय तहमा सरकार, बलियो स्थानीय तह बनाउनु पर्ने उनीहरूको एजेन्डा छ।
