काठमाडौं । नेकपा एमालेका प्रमुख सचेतक महेश बर्तौलाले राष्ट्र बैंकको गभर्नर नियुक्तिको विषयलाई लिएर सत्तारुढ दलहरूबीच कुनै विवाद नरहेको स्पष्ट पारेका छन् ।

शुक्रबार संसद भवन बानेश्वरमा सञ्चारकर्मीसँग कुरा गर्दै बर्तौलाले गभर्नर नियुक्तिमा केही ढिलाइ भए पनि त्यो प्रक्रियागत मात्रै भएको बताए । सत्तारुढ दल कांग्रेसभित्र मतभेद रहेको भन्ने प्रचार निराधार भएको उनको भनाइ छ ।

गभर्नरजस्तो संवैधानिक पद कुनै राजनीतिक दलको हिस्साको विषय नभएको उल्लेख गर्दै बर्तौलाले सरकारले योग्य व्यक्ति छान्ने जिम्मेवारी पूरा गर्ने बताए । “सरकारले उपयुक्त पात्रलाई उपयुक्त समयमा नियुक्त गर्छ,” उनले भने ।