घटस्थापनाको २ हप्ताअघि टिकट बुकिङ खुलाउने सरकारको तयारी

मेयरसाप डेस्क

काठमाडौं । सरकारले यस वर्षको दशैंमा घटस्थापनाको कम्तीमा १५ दिनअघि नै सार्वजनिक यातायातको अग्रिम टिकट बुकिङ खुलाउने तयारी गरेको छ।

सरकारले चाडपर्वमा हुने यात्रुको चापलाई सहज र व्यवस्थित बनाउन अग्रिम टिकट बुकिङ खुलाउने तयारी गरेको यातायात व्यवस्था विभागका निर्देशक नरहरी तिवारीले प्रतिनिधिसभा अन्तर्गतको भौतिक पूर्वाधार विकास समितिको बैठकमा जानकारी दिएका छन्।

उनका अनुसार, चाडपर्वमा काठमाडौंबाट बाहिरिने यात्रुको सङ्ख्या लाखौँमा पुग्ने भएकाले अग्रिम टिकट बुकिङले भीडभाड कम गर्न महत्वपूर्ण भूमिका खेल्नेछ। टिकट बुकिङ अनलाइन प्रणालीमार्फत बढी प्रोत्साहित गरिनेछ ताकि यात्रुले सजिलै र सहज तरिकाले आफ्नो यात्रा सुनिश्चित गर्न सकून्।

यातायात व्यवसायीहरूका प्रमुख माग भाडा समायोजन रहेको छ। विभागले इन्धनको मूल्य र सवारी साधनका पार्टपुर्जा तथा मर्मत खर्चलाई आधार मानेर भदौ महिनामा भाडा समायोजन गर्ने तयारी गरेको छ। 

सडकको अवस्था र यातायातको सुरक्षाका लागि विभागले यातायात व्यवसायी महासंघ, ट्राफिक प्रहरी, सडक विभाग र स्थानीय प्रशासनसँग निरन्तर समन्वय गर्दैछ। यसै क्रममा, गत वर्षदेखि सञ्चालनमा रहेको ‘ह्वाट्सएप ग्रुप’ मार्फत सडक मर्मत सम्भार र सुरक्षा अवस्थाको तत्काल जानकारी आदानप्रदान गरिनेछ।

यातायातको अतिरिक्त चाप व्यवस्थापनका लागि आवश्यक परेमा निजी विद्यालयका बसहरू र साझा यातायातका साधनहरूलाई समेत सञ्चालनमा ल्याउने व्यवस्था गरिनेछ। यसले यात्रुलाई थप सुविधा दिने विश्वास विभागले लिएको छ।

यस योजनाले यस वर्षको घटस्थापनादेखि यात्रुको भीड व्यवस्थापनमा सहजता ल्याउने अपेक्षा गरिएको छ। यात्रुले अग्रिम टिकट बुकिङ गरेर यात्रा सुनिश्चित गर्न विभागले आग्रह समेत गरेको छ।