भिजिट भिसा प्रकरण छानबिन नगरे सडकमा उत्रने चेतावनी

मेयरसाप डेस्क

काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले भिजिट भिसा प्रकरणको छानबिनका लागि सरकारले उच्चस्तरीय आयोग गठन नगरे सडक आन्दोलनमा उत्रने चेतावनी दिएका छन् ।

आइतबार झापामा सञ्चारकर्मीहरूसँग कुरा गर्दै लिङ्देनले सरकार र सभामुख देवराज घिमिरेको भूमिकाप्रति असन्तुष्टि व्यक्त गरे ।

उनले संसद्मा अवरोध जारी राख्ने र आवश्यक परे राष्ट्रिय स्वतन्त्र पार्टी (रास्वपा) सँग मिलेर सडक आन्दोलनमा जानसक्ने बताए । उनले सदनमा गरिएको विरोधलाई बेवास्ता गरिएको भन्दै आक्रोश व्यक्त गरे ।

अध्यक्ष लिङ्देनले यस प्रकरणको छानबिनका लागि गृहमन्त्री रमेश लेखकले नैतिकताको आधारमा राजीनामा दिनुपर्ने माग पनि राखे ।

‘गृहमन्त्रीले राजीनामा नदिए पनि छानबिन आयोग गठन हुनुपर्यो,’ उनले भने, ‘सरकारले हाम्रो मागलाई उपेक्षा गरिरहेको छ ।’

उनले यो सेसनभरि संसद्मा विरोध जारी राख्ने र जनताले यसको मूल्याङ्कन गर्ने विश्वास व्यक्त गरे ।