जेन–जी जाँचबुझ आयोगका पदाधिकारीविरुद्ध कारण देखाऊ आदेश जारी

विपक्षीलाई छलफलका लागि झिकाउने

मेयरसाप डेस्क

काठमाडौं । गत भदौमा भएको जेनजी आन्दोलनको छानबिन गर्न गठित उच्चस्तरीय जाँचबुझ आयोगका पदाधिकारीहरूविरुद्ध परेको रिटमा सर्वोच्च अदालतले कारण देखाऊ आदेश जारी गरेको छ ।

न्यायाधीश नृपध्वज निरौलाको इजलासले आयोगका अध्यक्ष गौरीबहादुर कार्की र सदस्यहरू विज्ञानराज शर्मा तथा विश्वेश्वरप्रसाद भण्डारीविरुद्ध रिटमाथि सुनुवाइ गर्दै यस्तो आदेश दिएको हो ।

रिट निवेदक अधिवक्ता ढकालले आयोगका पदाधिकारीहरूमाथि जाँचबुझको विषयवस्तुबारे सार्वजनिक धारणा राखेर पूर्वाग्रहीपन देखाएको आरोप लगाएका थिए ।

रिटमा पदाधिकारीहरूले न्यायिक मन प्रयोग गर्नुपर्नेमा पहिले नै धारणा सार्वजनिक गरिसकेकाले उनीहरूबाट पूर्वाग्रहरहित काम हुन नसक्ने जिकिर गर्दै अन्तरिम आदेशमार्फत काम गर्न रोक्न माग गरिएको थियो ।

अदालतले विपक्षीहरूलाई छलफलका लागि झिकाउने आदेश पनि जारी गरेको छ ।