ट्रम्पसँगको विवादपछि रिपब्लिकन सांसद ग्रीनको राजीनामा घोषणा

मेयरसाप डेस्क

एजेन्सी । हाई प्रोफाइल रिपब्लिकन नेता तथा जर्जियाकी सांसद मारजोरी टेलर ग्रीनले आगामी जनवरी ५, २०२६ मा राजीनामा दिने घोषणा गरेकी छन् । यो घोषणा राष्ट्रपति डोनाल्ड ट्रम्पसँगको विवादको केही दिनपछि आएको हो ।

ट्रम्पको मागा समर्थक मानिने ग्रीनले सामाजिक सञ्जालमा भिडियो विज्ञप्ति जारी गर्दै अगाडिको नयाँ बाटोको लागि उत्सुक रहेको बताएकी छन् ।

ग्रीनले ट्रम्पको आलोचना गरेकी छन्, जसले अर्को वर्षको चुनावमा उनलाई हटाउन रिपब्लिकन उम्मेदवारलाई समर्थन गर्ने धम्की दिएका थिए ।

उनीहरूबीचको सार्वजनिक विवाद मुख्यतया बाल यौन दुराचारी जेफ्री एपस्टिनसँग सम्बन्धित फाइलहरू सार्वजनिक गर्ने विषयमा भएको थियो । ग्रीनले आफ्नो क्षेत्रले ‘पीडादायी र घृणित प्राथमिक चुनाव सहनु नपरोस्’ भन्ने चाहेको बताएकी छन् ।

अमेरिकी मिडियाहरूले ग्रीनले अब जर्जियाको गभर्नर वा सिनेट सीटको लागि राज्य कार्यालयमा उम्मेदवारी दिने इच्छा देखाएको अनुमान गरेका छन् ।