झापा–५ : एमालेलाई छैन जोखिम, रास्वपाकाे हल्लाखल्ला

एमाले बलियो रहेको पोखरेलकाे दाबी

मेयरसाप डेस्क

काठमाडौं । नेकपा एमालेले झापा क्षेत्र नम्बर ५ मा पार्टीको अवस्था सुदृढ रहेको र त्यहाँ कुनै पनि चुनावी जोखिम नरहेको निष्कर्ष निकालेको छ ।

शुक्रबार पार्टी केन्द्रीय कार्यालय च्यासलमा आयोजित पत्रकार सम्मेलनमा महासचिव शङ्कर पोखरेलले झापा–५ को चुनावी सुरक्षाबारे पार्टीको आधिकारिक विश्लेषण सार्वजनिक गरेका हुन् ।

सामाजिक सञ्जालमा भइरहेका चर्चा र हल्लाखल्लाले केही प्रभाव पारेको देखिए पनि वास्तविक मतदाताको तहमा एमाले नै बलियो रहेको उनको दाबी छ । 

‘सोसल मिडियाको माहोल र ग्राउन्ड रियालिटी फरक छ,’ उनी भन्छन्, ‘हाम्रो विश्लेषणले भन्छ— झापा–५ मा हामी पूर्ण रूपमा सुरक्षित छौँ र त्यहाँ कुनै चुनौती छैन ।’

झापा क्षेत्र नम्बर ५ मा एमालेका तर्फबाट पार्टी अध्यक्ष केपी शर्मा ओली उम्मेदवार छन् । यो क्षेत्रमा राष्ट्रिय स्वतन्त्र पार्टीका वरिष्ठ नेता बालेन शाहले पनि उम्मेदवारी दिएपछि यसलाई देशभर ‘हेभिवेट’ भिडन्तको रूपमा हेरिएको छ ।