प्रचण्डले लिए दुुई सन्तानको अभिभावकत्व, प्रकाश भुजेलको गाडीको ठक्करबाट गुमाएका थिए अभिभावक

‘प्रचण्ड’ले ‘झाँक्री’ प्रकाश भुजेलको गाडीले ठक्कर दिँदा ज्यान गुमाएका नगरकोटी दम्पतीका दुई छोरीको जिम्मेवारी लिने घोषणा गरेका हुन् ।

Mayorsap

काठमाडौं । पूूर्व प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले ‘झाँक्री’ प्रकाश भुजेलको गाडीले ठक्कर दिँदा ज्यान गुमाएका नगरकोटी दम्पतीका दुई छोरीको जिम्मेवारी लिने घोषणा गरेका छन् ।

मंगलबार प्रचण्डको सचिवालयले यसबारे जानकारी दिएको हो । कागेश्वरी मनोहरा नगरपालिका–२, आलापोटका ३८ वर्षीय नारायण नगरकोटी र उनकी जीवन संगिनी ३२ वर्षीया सानुमाया नगरकोटीको घरमै पुगेर प्रचण्डले पीडित परिवारप्रति समवेदना प्रकट गरेका छन् । उनले नगरकोटी दम्पतीका दुई छोरी गरिमा र अनु नगकोटीको अभिभावक बनेर परिवारको दुःखमा पार्टी र आफू सँगै रहने प्रचण्डले बताएका छन् ।

प्रचण्डका स्वकीय सचिव रमेश मल्लले अध्यक्ष क. प्रचण्ड हिजो (सोमबार) बेलुकी कागेश्वरी मनोहरा–२, आलापोट पुगेको बताएका छन । झाँक्री प्रकाश भुजेलको गाडीले ठक्कर दिँदा ज्यान गुमाएका ३८ वर्षीय नारायण नगरकोटी र उनकी जीवन संगिनी ३२ वर्षीया सानुमाया नगरकोटीलाई श्रद्धाञ्जली अर्पण गर्नुका साथै परिवारजनमा समवेदना प्रकट गरेको बताएका छन । उनले नगरकोटी दम्पतिका दुई छोरी गरिमा र अनु नगरकोटी नानीहरूको अभिभावक बनेर परिवारको दुःखमा पार्टी र आफू सँगै रहने बताएको जानकारी दिएका छन ।

झाँक्री भुजेलले चलाएको बा १९ च २६९५ नम्बरको गाडीले गत कात्तिक २८ गते शंखरापुर नगरपालिका–९, साँखु–थली सडकखण्डमा बा प्र ०२–०१८ प ६८७५ नं को मोटरसाइकललाई ठक्कर दिएको थियो ।

भुजेल हाल प्रहरी हिरासतमा छन् । घटनामा गम्भीर घाइते भएका दुवै जनाको उपचारको क्रममा मृत्यु भएको थियो ।