सुदूरपश्चिम प्रदेशका १० स्थानीय तहमा कृषि तथा पशु ल्याबसहितका एकीकृत सेवा भवन निर्माण सम्पन्न भएको छ। निर्माण भएका भवनहरू स्थानीय तहलाई असोज मसान्तसम्म हस्तान्तरणको तयारी भइरहेको ग्रामीण उद्यम तथा आर्थिक विकास आयोजना कोरिडोर कार्यालय, डडेलधुराका प्रमुख डा. उत्तम आचार्यले जानकारी दिएका छन्।

डडेलधुराका चार, कैलाली र दार्चुलाका दुई-दुई तथा बैतडी र डोटीका एक-एक पालिकामा भवन निर्माण गरिएको छ। ती पालिकाहरूमा डडेलधुराको आलिताल गाउँपालिका, गन्यापधुरा गाउँपालिका, अजयमेरु गाउँपालिका र नवदुर्गा गाउँपालिका, बैतडीको पाटन नगरपालिका, दार्चुलाको शैल्यशिखर नगरपालिका र मालिकार्जुन गाउँपालिका, कैलालीको गोदावरी नगरपालिका र चुरे गाउँपालिका तथा डोटीको जोरायल गाउँपालिका रहेका छन्।

सोमबार जिल्ला सदरमुकाममा आयोजित कार्यक्रममा कार्यालय प्रमुख आचार्यले दसैँतिहारको बिचमा ती भवनहरू हस्तान्तरण गरिने बताए। भवनमा कृषि तथा पशु ल्याबसहितको सुविधा रहने र यसले किसानका काम प्रभावकारी रूपमा सम्पन्न हुने अपेक्षा गरिएको छ।

पालिकाहरूमा कृषि र पशु शाखाका काम अहिले एउटै कोठाबाट सीमित रूपमा हुँदै आएको छ, जसका कारण सेवा प्रवाहमा कठिनाइ भएको थियो। नयाँ भवनको निर्माणसँगै कृषि र पशु सेवालाई प्रभावकारी बनाउन ल्याबसहितका सुविधा उपलब्ध गराइने बताइएको छ।

नेपाल सरकार र विश्व बैंकबीच २०७७ पुस ६ गते सम्झौता भएपछि सुदूरपश्चिमका पाँच जिल्लाका १७ वटा स्थानीय तहमा ग्रामीण उद्यम तथा आर्थिक विकास आयोजना लागू भएको हो। महाकाली राजमार्ग अन्तर्गतका जिल्लाहरूमा लागू गरिएको यो आयोजना पाँच वर्षका लागि सञ्चालनमा आएको हो।

आर्थिक वर्ष २०८१/८२ का लागि ३५ करोड ८४ लाख ४८ हजार रुपैयाँ बजेट छुट्याइएको छ। साथै, रिडसँग सम्झौता भएका ३० वटा उत्पादक संस्थाहरूलाई अनुदान प्रदान गरिनेछ, जसमा कृषक समूह २४ र सहकारी संस्था ६ रहेका छन्।