एजेन्सी । केन्द्र सरकारले स्थानीय सरकारका ऋणहरू प्रतिस्थापन गर्न ६-ट्रिलियन युआन अर्थात (८४० बिलियन अमेरिकी डलर) नयाँ स्थानीय सरकारी ऋण कोटाको स्वीकृति दिएपछि चीनभरका स्थानीय सरकारहरूले ऋण प्रतिस्थापन कार्यान्वयन गर्न द्रुत कदम चालेका छन्।

यस कदमले स्थानीय सरकारहरूलाई ऋण अन्त्य गर्न र आर्थिक विकासका लागि थप स्रोतहरू परिचालन गर्न दबाब दिएकाे चिनियाँ विश्लेषकहरूकाे दाबी छ।

शुक्रबार, उत्तर चीनको हेबेई प्रान्तले ३० वर्षको अवधिका लागि स्थानीय सरकारहरूका लुकेका ऋणहरू प्रतिस्थापन गर्न २८ दशमलव १ बिलियन युआन जारी गर्ने योजनाको खुलासा गर्‍यो।

सोही दिन दक्षिणपश्चिम चीनको सिचुवान प्रान्तले १० वर्षे ऋणपत्रका लागि २६ अर्ब युआन, १५ वर्षे ऋणपत्रका लागि २६ अर्ब युआन र ३० वर्षका लागि २७ अर्ब ४० करोड युआन रहेको विशेष ऋणपत्र पुनर्कर्जाका लागि ७९.४ अर्ब युआन जारी गर्ने घोषणा गरेको छ।

दक्षिणपश्चिम चीनको युनान प्रान्तले विशेष ऋणपत्रहरूको पुनवृत्तिका लागि ५५ दशमलव ५ बिलियन युआन जारी गर्ने योजनाको अनावरण गरेको छ जसमा १० वर्षीय ऋणपत्रहरूको लागि १५ अर्ब युआन, १५-वर्षीय ऋणपत्रहरूको लागि १५ अर्ब युआन र ३०-वर्षीका लागि २५ दशमलव ५ बिलियन युआन छुट्याएको छ।

पछिल्लो तथ्याङ्क अनुसार, चीनका कुल १६ प्रान्तहरूले विद्यमान लुकेका ऋणहरू प्रतिस्थापन गर्न विशेष पुनर्वित्त ऋणपत्र जारी गर्ने घोषणा गरेका छन्, कुल जारी गर्ने रकम १.०८५२ ट्रिलियन युआनभन्दा बढी छ।

नोभेम्बर ८ मा आयोजित पत्रकार सम्मेलनमा चिनियाँ सांसदहरूले स्थानीय सरकारको ऋणको सीमा ६ ट्रिलियन युआनले बदल्ने राज्य परिषद्को विधेयकलाई अनुमोदन गरेपछि यो कदम अगाडि बढाइएकाे बताएका थिए ।

नोभेम्बर ९ मा विभिन्न स्थानीय तहमा ऋणको कोटाकाे विषयमा स्थानीय अधिकारीहरूलाई तुरुन्त कानुनी प्रक्रियाहरू पूरा गर्न निर्देशन दिइएकाे थियाे । त्यस्तै, ऋणपत्र जारीको सहज कार्यान्वयन सुनिश्चित गर्न पनि भनिएकाे थियाे।

ऋणको पुनर्संरचनाले स्थानीय सरकारहरूलाई आर्थिक विकास प्रवर्द्धन गर्न बाटाे खाेल्ने बताइएकाे छ । नयाँ सरकारी खर्चले राष्ट्रिय अर्थतन्त्रमा पनि धेरै प्रभाव पार्नेछ, जसले यो वर्ष र २०२५ को चौथो त्रैमासिकमा अर्थतन्त्रमा सकारात्मक प्रभाव पार्ने आँकलन गरिएकाे छ । स्थानीय सरकारहरूलाई ऋणकाे सहजिकरण गरिदिएसँगै चीनले  ५ प्रतिशतको कुल गार्हस्थ्य उत्पादन वृद्धिको लक्ष्य पूरा गर्ने जनाएकाे छ ।

स्वदेश र विदेशमा बढ्दो चुनौतीहरूको बाबजुद पनि यस वर्षको पहिलो तीन त्रैमासिकमा चीनको कुल गार्हस्थ्य उत्पादन वार्षिक रूपमा ४.८ प्रतिशतले बढेको छ र चीनको अर्थतन्त्र अक्टोबरमा थप सुदृढ हुने संकेत देखिएको छ।