सुर्खेत । नेकपा माओवादीको पकेट क्षेत्र मानिएको जाजरकोटको नलगाड नगरपालिकाको उपप्रमुख पदका लागि हुन लागेको उपनिर्वाचनमा ६ जना उम्मेदवार प्रतिस्पर्धामा छन् । नेकपा एमालेबाट सुनिता बोहोरा, नेपाली कांग्रेसबाट इन्द्रा चन्द सिंह, नेकपा माओवादी केन्द्रबाट देवका लामिछाने उम्मेदवार छन् ।

यस्तै राष्ट्रिय स्वतन्त्र पार्टी (रास्वपा)ले पार्वती पुन, राप्रपाले सुनिता पुन रावल र नेपाल समाजवादी पार्टीले पवित्रा जैसीलाई उम्मेदवार बनाएको छ । ०७९ वैशाखमा भएको स्थानीय तह निर्वाचनमा कांग्रेस–माओवादी गठबन्धन भए पनि यो पटक सबै दलका उम्मेदवार एक्लाएक्लै प्रतिस्पर्धामा उत्रिएका छन् ।

०७९ को निर्वाचनमा माओवादीको समर्थनमा उपप्रमुखमा निर्वाचित सरिता सिंहको ०८० कात्तिकमा भूकम्पमा परेर निधन भएपछि यहाँ उपनिर्वाचन हुन लागेको हो । अघिल्लो निर्वाचनमा उनी ५ हजार ४०६ मत ल्याएर विजयी भएकी थिइन् । उनका निकटतम प्रतिस्पर्धी एमालेकी सुनिता बोहोराले ३ हजार ३९३ मत पाएकी थिइन् । यस्तै राप्रपाले ४८ मत र एकीकृत समाजवादीले ३६ मत पाएका थिए ।

अहिले एकीकृत समाजवादीले उम्मेदवार उठाएको छैन भने अर्को दललाई पनि समर्थन पनि गरेको अवस्था छैन । ६ जना उम्मेदवार भए पनि यहाँ माओवादी र कांग्रेसबिच कडा प्रतिस्पर्धा हुने छ भने एमाले दुई दलबिचको लडाइँको फाइदा बटुल्ने रणनीतिमा छ । यहाँ रास्वपाको भने खासै प्रभाव छैन ।