काठमाडौँ । धरान उपमहानगरपालिकाका प्रमुख (मेयर) हर्कराज साम्पाङले अख्तियार दुरुपयोग अनुसन्धान आयोगलाई जवाफी पत्र पठाएका छन्। उनीविरुद्ध खानेपानी आयोजना निर्माणमा अनियमितता गरेको आरोप लगाउँदै आयोगमा उजुरी परेपछि अख्तियारले उनीसँग जवाफ मागेकाे थियाे । सोही विषयमा मेयर साम्पाङले शुक्रबार जवाफी पत्र पठाएका हुन्।

धरानमा पानीकाे समस्या अझै रहेकाे भन्दै मेयर हर्क थोत्रे गाग्री लिएर सिंहदरवार पनि आएका थिए । उनी सिंहदरबारबाट धरान नपुग्दै अख्तियारले उनीमाथि स्पष्टिकरण साेधेकाे हाे ।

उनले पत्रमा केन्द्र सरकारबाट कोशीको पानी ल्याएर खुवाउने सम्भावना नभएपछि बोर्डको स्वायत्त अधिकार प्रयोग गरी समर्थक र सहयोगीहरूको आर्थिक र भौतिक सहयोग लिएर कोकाहा खानेपानी श्रमयोजना २ चलिरहेको पनि जानकारी दिएका छन् ।

साम्पाङले जवाफी पत्रमा भनेका छन्, “उजुरी लाउने मान्छेले कति वटा पाइप किनेर दियो ? कति दिन श्रमदान गर्‍याे ? को हो त्यो ? बुझेर लेखिपठाउनु होला, धरानको हो कि धरान बाहिरको हो, त्यो फटाहा ? अचम्म लाग्छ, यत्रो दुःख गर्दा नि ताली नबजाको देख्दा । राज्यको ढुकुटी खर्चेर बनाएको मेलम्ची, दमक टावर जस्ता कुरा तिर नलागेर श्रमदान अभियानको खेदो नखन्नु है, नखन्नु, तिर्खाएका मानिसहरूको श्राप लाग्ला । पानी भनेको विकास होइन, जीवनको आधार, मानिसको आधारभूत आवश्यकता हो । पानीमा राजनीति गर्नु हुँदैन । पानी माग्न जनता त्यता आउलान है फेरि ।”