काठमाडौं । नेपाल गणित समाजको केन्द्रीय सभापतिमा सहप्राध्यापक डा. श्रीराम खड्का विजयी भएका छन् । शनिबार त्रिभुवन विश्वविद्यालयमा सम्पन्न भएको निर्वाचनमा खड्का विजयी उन्मुख भएका हुन् । निर्वाचनमा कुल ५३१ मत खसेको छ । कुल ४ सय मत गणना गरिसक्दा खड्काले २५९ मत पाएका छन् भने उनका प्रतिस्पर्धी डा. जिवन काफ्लेले १३६ मत मात्र पाएका छन् । अब गणना हुन बाँकी १३६ मत रहेको छ । 

डा. काफ्लेले हार स्वीकार्दै डा. खड्कालाई बधाई तथा शुभकामना दिएका छन् । यसैगरीे उप–सभापतिमा डा. परमेश्वरी कट्टेलले २९८ मत ल्याउँदा उनका प्रतिस्पर्धी डा. अजयकुमार चौधरीले ९४ मत ल्याएका छन् । सचिवमा भने डा. रमेश गौतमले २८३ मत ल्याउँदा उनका प्रतिस्पर्धी टेकबहादुर बुढाथोकीले १०६ मत ल्याएका छन् । 

त्यसैगरी सह–सचिवमा विष्णुप्रसाद भण्डारीले १४७ मत ल्याउँदा डा. नवराज अधिकारीले २०४ मत प्राप्त गरेका छन् । अन्य पदाधिकारी तथा सदस्यहरुको पनि मत गणना भइरहेको छ । कोषाध्यक्षमा डा. सरस्वती आचार्य निर्विरोध निर्वाचित भएकी छन् ।