काठमाडौं । नेपाल हङकङ चाइनासँग २ रनले पराजित भएको छ । युगान्डा क्रिकेट एसोसिएसनको आयोजनामा जारी चार देशीय सिरिज अन्तर्गत हङकङले दिएको १०१ रनको लक्ष्य पछ्याएको नेपालले २० ओभरमा ७ विकेट गुमाउँदै ९८ रन मात्र बनाएपछि नेपाल २ रनले हारेको हो । 

नेपालका लागि कप्तान इन्दु बर्माले सर्वाधिक ३२ रन बनाएकी थिइन् भने पूजा महतोले १९, विन्दु रावलले १४ र साना प्रविनले १० रन बनाएकी थिइन् । यसअघि टस हारेर पहिला ब्याटिङ गरेको हङकङले २० ओभरमा ७ विकेट गुमाउँदै १०० रन बनाएको थियो । हङकङका लागि कप्तान नताशा माइल्सले सर्वाधिक ३५ रन बनाएकी थिइन् भने मारिको हिलले २१ रन बनाएकी थिइन् ।  

त्यस्तै नेपाली बलर इन्दु बर्मा र इश्वरी विष्टले २/२ विकेट लिए भने पुञ्ज महतो र रचना चौधरीले एक/एक विकट लिएका थिए ।  यस सिरिजमा नेपालले खेलेका ३ खेलमा एक जित र २ हार व्यहोरेको छ । त्यस्तै हङकङले भने ३ खेलमा २ जित र एक हार व्यहोरेको छ ।

नेपालले अर्को खेल मार्च १२ मा नामिबियाविरुद्ध, मार्च १३ मा युगाण्डाविरुद्ध र मार्च १४ मा हङकङविरुद्ध खेल्ने छ । त्यसपछि मार्च १६ मा अंक तालिकामा पहिलो र दोस्रो हुने तथा तेस्रो र चौथो हुने टीमबीच खेल हुने छ ।