स्थानीयले अवरुद्ध गरेको पूर्व पश्चिम-राजमार्ग ३ घण्टापछि सञ्चालनमा
Mayorsap | २ महिना अगाडि 
बुटवल । बर्दियामा जङ्गली हात्तीको आक्रमणबाट स्थानीयको मृत्यु भएपछि स्थानीयले बुधवार अवरुद्ध पारेको पूर्व पश्चिमी राजमार्ग सञ्चालनमा आएको छ ।
पूर्व-पश्चिम राजमार्ग भुरीगाउँ-चिसापानी सडक खण्डको बलाटी भन्ने ठाउँमा स्थानीयवासीले राजमार्ग अवरुद्ध गरेको सडक करिब ३ घण्टापछि सञ्चालनमा आएको छ ।
गएराति ठाकुर बाबा नगरपालिका-२, बलाटीका ७१ वर्षीय बोलिराम थारुको हात्तीको आक्रमणबाट मृत्यु भएको थियो ।
मानव-वन्यजन्तु द्वन्द्व न्यूनीकरणको लागि दिगो समाधान खोज्न माग गर्दे स्थानीयहरूले सडक अवरुद्ध पारेका थिए । जिल्ला प्रहरी कार्यालय बर्दियाका सूचना अधिकारी प्रहरी निरीक्षक कृष्ण डाँगीले स्थानीयहरूसँग मौखिक रूपमा पीडितलाई क्षतिपूर्ति सहमति भएपछि अहिले सडक सञ्चालनमा आएको बताए ।
उनले करिब ३ घण्टा परि सडक सञ्चालनमा आएपछि रोकिएका सवारी साधनहरु आ-आफ्नो गन्तव्यमा लागेको बताए ।
गएराति आफ्नो घर नजिकैको खेतमा हात्तीले गहुँ खाएको थाहा पाएपछि धपाउन निस्केका थारुको हात्तीले आक्रमण गरेर मृत्यु भएको थियो । स्थानीयहरू निकुञ्ज तथा स्थानीय तहले क्षतिपूर्ति दिनुपर्ने माग राखेका थिए ।
