बारा । बारा जिल्ला सदरमुकाम कलैयाको प्रमुख स्थल भरत चौकमा नेपाली सेनाद्वारा पुनर्निर्माण गरिएको पार्कको औपचारिक उद्घाटन सम्पन्न भएको छ ।

पार्कको उद्घाटन नेपाली सेनाका मध्यपूर्वी पृतनाका पृतनापति उपरथी कृष्ण प्रसाद जिसी र कलैया उपमहानगरपालिकाका नगरप्रमुख विनोद साहले संयुक्त रूपमा गरे ।

कलैयाको केन्द्रमा अवस्थित यो पार्क विगतमा जीर्ण भइसकेको थियो । त्यसको पुनर्निर्माण नेपाली सेनाको ब्रह्मपुरीस्थित ज्वालादल गणले गरेको हो ।

कार्यक्रमका प्रमुख अतिथि उपरथी जिसीले उद्घाटन समारोहमा नेपालका सम्पूर्ण वर्ग र समुदायले देशको सुरक्षा र समृद्धिमा योगदान दिएको उल्लेख गर्दै, त्यसको संरक्षण सबैको साझा जिम्मेवारी रहेको बताए ।

पार्कमा मधेशका वीर सैनिकहरूको प्रतिनिधित्व स्वरूप नेपालको नक्साको दुबै छेउमा भाला बोकेका दुई मधेसी व्यक्तिहरूका मूर्तिहरू स्थापना गरिएको छ ।

उद्घाटनपछी उपरथी जिसीले पार्कको औपचारिक हस्तान्तरण नगरप्रमुख साहलाई गरेका थिए ।

नेपाली झण्डा फहराउँदै विधिपूर्वक सम्पन्न भएको उक्त समारोहमा उपप्रमुख राेशन प्रविन, प्रमुख प्रशासकीय अधिकृत नाथु साह, वडा नं‍ १ का वडाध्यक्ष मोहन क्षेत्री, विभिन्न सुरक्षा निकायका प्रमुखहरू, सञ्चारकर्मीहरू र स्थानीय नागरिकहरूको उल्लेखनीय उपस्थिति रहेको थियो ।