सिरहा । गृहकार्य नगरेको भन्दै सिरहाको गोलबजार नगरपालिकामा रहेको एक निजी विद्यालयका विद्यार्थीमाथि निर्घात कुटपिट भएको छ। गोलबजार नगरपालिका– ७ चोहर्वास्थित एपेक्स विद्या मन्दिरमा कक्षा ८ मा अध्ययनरत विद्यार्थी अविनाश यादवलाई शिक्षक सन्तोष गुप्ताले शुक्रबार मरणासन्न हुने गरी कुटपिट गरेका हुन् । 

गृहकार्य किन नगरेको भन्दै शिक्षक गुप्ताले अविनाशलाई अर्को कोठामा लगी ढोका बन्द गरेर बाँसको लठ्ठिले निर्घात कुटपिट गरेको परिवारजनले बताएका छन् । शिक्षक गुप्ताको कुटपिटबाट विद्यार्थीको शरीरका विभिन्न भागमा नीलडाम बसेको छ । उनको अहिले गोलबजारस्थित बर्धमान अस्पतालमा प्रारम्भिक उपचार भइरहेको बताइएको छ । 

घटना लगत्तै दोषी शिक्षकलाई कारवाहीको माग गर्दै विद्यार्थीका अभिभावकले इलाका प्रहरी कार्यालय गोलबजारमा उजुरी गरेका थिए । त्यसपछि शिक्षक सन्तोष गुप्तालाई पक्राउ गरिएको इप्रका गोलबजारका प्रहरी निरीक्षक गोविन्द साहले जानकारी दिए ।  घटनाबारे अनुसन्धान भइरहेको र दोषी शिक्षकमाथि कानून बमोजिम कारवाही गरिने उनले बताए ।