महानगरका प्रवक्ता नवीन मानन्धरद्वारा स्वास्थ्य केन्द्र भवनको उद्घाटन

मेयरसाप डेस्क | २ हप्ता अगाडि

काठमाडौं । काठमाडौं महानगरपालिका वडा नम्बर १७ को स्वास्थ्य प्रवर्धन केन्द्रका लागि निर्माण गरिएको भवनको आज उद्घाटन गरिएको छ । महानगरपालिकाका प्रवक्ता एवं वडा नं. १७ का अध्यक्ष नवीन मानन्धरले आज एक कार्यक्रमबिच शिलापत्र अनावरण गरेर भवन उद्घाटन गरेका हुन् ।

भवन ‘स्वास्थ्य प्रवर्धन केन्द्र तथा भवन निर्माण तथा सामुदायिक पुस्तकालय उपभोक्ता समिति’ले निर्माण गरेको हो । त्यस अवसरमा प्रवक्ताको रोहवरमा समितिका अध्यक्ष उर्मिला कनौजिया (मगिया)ले भवनको साँचो वडा सदस्य जितेन्द्र खड्गीलाई हस्तान्तरण गरेकी थिइन् । यस्तै खड्गीले प्रवर्धन केन्द्रका इञ्जार्ज सरस्वती पनेरुलाई हस्तान्तरण गरेका थिए । 

कार्यक्रममा बोल्दै प्रवक्ता मानन्धरले, जनप्रतिनिधिको सेवाप्रति समान दृष्टि रहेको, यस दृष्टिलाई स्थानीयवासीले अपनत्व ग्रहण गरेको र साझेदारबिच नजिक समन्वय भएकोले भवन निर्माण सम्भव भएको उल्लेख गर्दै विकासमा स्थानीयवासीको सहभागिता अपरिहार्य हुने धारणा राखे ।

पछिल्लो समय मानव स्वास्थ्यमा देखिएका रोगहरूको उपचार पद्धतिको जटिलतामा कुरा गर्दै मानन्धरले भने, ‘जीवनभर कमाएको पैसाले उपचार गर्दा पनि निको बनाउन नसकिने अवस्था आउन दिनु हुँदैन । यसका लागि आज स्वास्थ्यप्रति सचेत भएर निदानात्मक उपाय अवलम्बन गर्नु पर्छ । यो स्वास्थ्य शिक्षा क्षेत्रको कार्यक्रम हो । सावधानी अपनाउँदा अपनाउँदै उपचारमा जानु पर्ने अवस्थामा सहज, सरल र सुपथ सेवा प्राप्त गर्नुपर्छ ।’

‘नागरिकले तिरेको राजस्वको उपयोग भएको छ ।’ कार्यक्रममा स्वास्थ्य विभागका प्रमुख दीपककुमार केसीले भने, ‘भाडाका भवनबाट सेवा सञ्चालन गर्नुपर्दा करदाताको पैसा बहालमा खर्च भएको थियो । अब आफ्नै भवन भयो । यसपछि बहाल तिर्ने रकम गुणस्तरीय र पहुँचयुक्त स्वास्थ्य सेवा वितरणमा खर्च हुनेछ ।’

कार्यक्रममा बोल्दै छत्रपाटी निःशुल्क चिकित्सालयका अध्यक्ष डा. मनोजमान श्रेष्ठले, अल्ट्रासाउन्ड र एक्स रे सेवा थप गर्न सके विशेषज्ञ स्वास्थ्य सेवाका लागि अन्यत्र जानु नपर्ने धारणा राखे । 

महानगरपालिकाको गौरव योजना ‘सुलभ स्वास्थ्य सेवा, नागरिकलाई टेवा’ कार्यक्रमबाट भवन निर्माण गरिएको हो । भवन निर्माणका लागि २०८१ माघ १० गते स्वास्थ्य विभाग र उपभोक्ता समितिबिच सम्झौता भएको थियो । २०८२ वैशाख मसान्तमा निर्माण सम्पन्न भएको भवनको लागत करिब ८० लाख रुपैयाँ हो ।