इटहरीमा ठूलो परिमाणमा लागूऔषधसहित फार्मेसी सञ्चालक दम्पती पक्राउ

मेयरसाप डेस्क

सुनसरी । सुनसरीको इटहरी उपमहानगरपालिका–१२ बाट ठूलो परिमाणको लागूऔषधसहित एक फार्मेसी सञ्चालक दम्पती पक्राउ परेका छन्।

विशेष सुराकीका आधारमा गरिएको छापामारीपछि जिल्ला प्रहरी कार्यालय भोजपुर, इलाका प्रहरी कार्यालय इटहरी र प्रहरी चौकी खनारबाट खटिएको संयुक्त टोलीले उनीहरूलाई नियन्त्रणमा लिएको हो।

प्रहरीका अनुसार इटहरी–१२ का ५० वर्षीय नसिव नारायण चौधरीको घरमा खानतलासी गर्दा प्लास्टिकको बोरामा लुकाइ राखिएको ट्रामाडोल १९ हजार ८०० क्याप्सुल तथा नियन्त्रित औषधि डिकोलिक चार हजार ट्याब्लेट बरामद गरिएको छ । 

चौधरी ‘नसिव फार्मेसी’ सञ्चालन गर्दै आएका व्यक्ति हुन् । लागूऔषध बरामद भएपछि चौधरी र उनकी श्रीमती सम्झना चौधरी दुवैलाई प्रहरीले पक्राउ गरेको छ । उनीहरूविरुद्ध इलाका प्रहरी कार्यालय इटहरीमा थप अनुसन्धान र आवश्यक कानुनी प्रक्रिया अगाडि बढाइएको कोशी प्रदेश प्रहरी कार्यालय विराटनगरले जनाएको छ ।