‘पहुँच सुनिश्चित’ गर्ने नेपालकै पहिलो नगर बन्यो नारायण नगरपालिका

सामाजिक सुरक्षा भत्ता अब सहजै

मेयरसाप डेस्क

दैलेख । दैलेखको नारायण नगरपालिकालाई गत बुधबार औपचारिक रूपमा सामाजिक सुरक्षा भत्ता लाभग्राहीको पहुँच सुनिश्चितता नगर घोषणा गरिएको छ ।

नगरपालिकाले आवश्यक सूचकहरू पूरा गरेपछि यो घोषणा गरिएको हो, जसबाट नगर क्षेत्रका सबै योग्य नागरिकले सहज रूपमा सामाजिक सुरक्षा भत्ता प्राप्त गर्न पाउने व्यवस्था सुनिश्चित भएको छ ।

नगरप्रमुख लोमन शर्माले सन् २०३० भित्र सबै नागरिकलाई सामाजिक सुरक्षाको पहुँचमा ल्याउने सरकारी लक्ष्य हासिल गर्ने दिशामा नारायण नगरपालिकाबाट यो पहिलो प्रगतिशील कदम सुरु भएको बताए ।

नगरप्रमुख शर्माले भत्ता वितरण सहज र व्यवस्थित गर्न नीतिगत व्यवस्था गरिएको र यसको दिगोपनाका लागि स्थानीय सरकार निरन्तर प्रतिबद्ध रहने जानकारी दिए ।

घोषणा सभामा बोल्दै कर्णाली प्रदेशका सामाजिक विकास मन्त्री घनश्याम भण्डारीले सामाजिक सुरक्षा भत्तालाई केवल खर्च जोहो गर्ने माध्यम मात्र नबनाई दीर्घकालीन फाइदा हुने क्षेत्रमा सदुपयोग गर्नुपर्नेमा जोड दिए ।

मन्त्री भण्डारीले कर्णाली प्रदेश सरकारले शैक्षिक छात्रवृत्ति, छोरीबुहारी छात्रवृत्ति, बैंक खाता–छोरीको सुरक्षा, जीवनभरिको कार्यक्रम जस्ता प्रभावकारी योजनाहरू सञ्चालनमा ल्याएको र भाषा, कला, संस्कृति तथा परम्परागत सीपको संरक्षणका लागि सीपमूलक कार्यक्रमहरू पनि सञ्चालन भइरहेको जानकारी गराए ।