अस्पतालका चिकित्सकमाथि आ*क्रमण गर्ने ४ जना पक्राउ

मेयरसाप डेस्क

चितवन । चितवनको माडी नगरपालिकास्थित बघौडा अस्पतालका चिकित्सक तथा स्वास्थ्यकर्मीमाथि आक्रमण गर्ने चार जना आरोपीलाई प्रहरीले पक्राउ गरेको छ ।

गत बिहीबार राति सवा १० बजेको समयमा चार–पाँच जनाको समूहमा आएका युवाले मादक पदार्थ सेवन गरी अस्पताल परिसरभित्रै चिकित्सक तथा स्वास्थ्यकर्मीमाथि घाउचोट पुग्ने गरी आक्रमण गरेका थिए ।

इलाका प्रहरी कार्यालय माडीका प्रहरी निरीक्षक किरण राईका अनुसार अस्पतालको निवेदनपछि पक्राउ पर्नेमा माडीका किरण खाती, सङ्गम तिवारी, विकास गुरुङ र प्रकाश गौतम रहेका छन् ।

निमित्त मेडिकल सुपरिटेन्डेन्ट डा. धीरञ्जनकुमार साहका अनुसार, डा. दीपेन्द्र विश्वास, डा. देवेन्द विश्वास, हे.अ. अनुप सुवेदी र कविराज तिवारीलगायत चिकित्सक र स्वास्थ्यकर्मीहरूमाथि कुटपिट भएको थियो ।

प्रहरी निरीक्षक राईले चिकित्सकहरूले कुटपिटमा मुद्दा चलाउने बताएको र कुटपिटको मुद्दा सिधैँ अदालतबाट चल्ने जानकारी दिए । घटनाबारे थप अनुसन्धान भइरहेको छ ।

नेपाल चिकित्सक सङ्घ चितवनका वरिष्ठ उपाध्यक्ष डा. दीपेन्द्र न्यौपानेले स्वास्थ्यकर्मीमाथि आक्रमण गर्ने दोषीलाई कानुनअनुसार हदैसम्मको कारबाही हुनुपर्ने माग गरेका छन् ।