एनआरएनएमा एकता घोषणा : केसी र श्रेष्ठ समूहबीच १० बुँदे सहमति

६ महिनाभित्र १२औँ महाधिवेशन हुने

मेयरसाप डेस्क

काठमाडौं । लामो समयदेखि विभाजित गैरआवासीय नेपाली सङ्घ (एनआरएनए) बीच आज प्रधानमन्त्री तथा मन्त्रिपरिषद्को कार्यालयमा ऐतिहासिक एकता घोषणा भएको छ ।

प्रधानमन्त्री सुशीला कार्की र सञ्चार तथा सूचना प्रविधिमन्त्री जगदीश खरेलको उपस्थितिमा डा. बद्री केसी र महेशकुमार श्रेष्ठले एकतासम्बन्धी सम्झौतापत्रमा हस्ताक्षर गरेका हुन् ।

सञ्चारमन्त्री खरेलको विशेष पहल र अग्रसरतामा एनआरएनका दुई समूहबीच दश बुँदे सहमतिसहित एकता कायम भएको हो ।

मन्त्री खरेलले यो एकता कागजमा मात्र नभई मन र मस्तिष्क दुवैमा कायम रहोस भन्दै एनआरएनलाई पार्टीभन्दा माथि उठेर मुलुकको आर्थिक समृद्धिका लागि बढीभन्दा बढी लगानी भित्र्याउन आग्रह गरे ।

अध्यक्ष डा. केसीले एकताले ८० लाख नेपालीलाई सकारात्मक सन्देश दिएको र अब एनआरएनएलाई राजनीतिक कोणबाट कहिल्यै विभाजन नहुने गरी कानुनी व्यवस्था हुनुपर्नेमा जोड दिए । 

अध्यक्ष श्रेष्ठले पनि एकताले ज्ञान, सीप र पुँजी नेपाल भित्र्याउन मद्दत पुग्ने विश्वास व्यक्त गरेका छन् । दुवै नेतृत्व एकताबद्ध भएपछि अबको ६ महिनाभित्र १२औँ अन्तरराष्ट्रिय महाधिवेशन गर्ने सहमति जुटेको छ ।