चितवन-पर्सा कम्प्लेक्समा बाघ गणनाको काम सकियो
मेयरसाप डेस्क
|
२०८२ फागुन ८ गते ११:५८
चितवन । चितवन र पर्सा राष्ट्रिय निकुञ्जलाई एउटै ‘कम्प्लेक्स’ मानेर सुरु गरिएको बाघ गणना बिहीबार सम्पन्न भएको छ ।
गत पुस ३ गतेदेखि सुरु भएको यस गणनाका क्रममा प्रयोग गरिएका कुल १ हजार ७८० क्यामेरामध्ये ६० वटा हराएको र २५ वटा बिग्रिएको निकुञ्ज प्रशासनले जनाएको छ ।
चितवन राष्ट्रिय निकुञ्जका सूचना अधिकारी अविनास थापा मगरका अनुसार ९५८ वटा ग्रिडमा विभाजन गरी गरिएको यो गणनामा ८५ वटा क्यामेरा समस्याग्रस्त देखिएका हुन् ।
प्रत्येक दुई वर्ग किलोमिटर क्षेत्रलाई एउटा ग्रिड बनाई १७ रातसम्म क्यामेरा राखेर बाघका गतिविधि कैद गरिएको थियो ।
सन् २०२२ को तथ्यांक अनुसार नेपालमा ३५५ वयस्क बाघ रहेकोमा चितवनमा मात्रै १२८ र पर्सामा ४१ वटा बाघ फेला परेका थिए ।
क्यामेरा हराउने र बिग्रने जस्ता प्राविधिक चुनौतीका बावजुद निकुञ्जले यसपटकको गणना कार्यलाई निर्धारित समयमै पूरा गरेको छ ।
Facebook Comments