ताप्लेजुङको मिक्वाखोला गाउँपालिका–५ पापुङमा तोक्पेगोला पर्यटन तथा चौँरी महोत्सव आयोजना हुने भएको छ ।

पछिल्लो समयमा चौँरीयाक पालनप्रति युवापुस्ताले चासो नदिएसँगै यस पेसा सङ्कटमा पर्ने जाने भन्दै चौँरीयाक पालकहरूलाई प्रोत्साहन तथा मनोबल बढाउन मिक्वाखोला गाउँपालिका–५ले महोत्सवको आयोजन गर्न लागेको हो ।

चौँरीयाक गोठ संरक्षण र प्रवद्र्धनले हाम्रो उच्च हिमाली क्षेत्रको सांस्कृतिक, आर्थिक र जैविक विविधताको संरक्षणमा महत्त्वपूर्ण भूमिका खेल्ने आयोजकले जनाएको छ ।

महोत्सव आयोजक समितिले जारी प्रेस विज्ञप्तिअनुसार आउँदो शुक्रबारदेखि सोमबार गरी चार दिनसम्म तोक्पेगोला पर्यटन तथा चौँरी महोत्सव हुने प्रचारप्रसार संयोजक नुपु शेर्पाले जानकारी दिए ।

मिक्वाखोला गाउँपालिकामा फुडफुडगे झरना, हिलिमा झरना, सोदुपोखरी, भूतपोखरी, तीनपोखरी, मिक्वा पोखरी, लोदेनलगायत सयौँ ताल तथा पोखरीको प्रचारप्रसार गर्ने उद्देश्यले महोत्सवको आयोजना गर्न लागेको आयोजकले जनाएका छन् ।