जनकपुरधाम उपमहानगरपालिका वडा नं. २४ का वडाध्यक्ष र वडा सचिवसहित तीन जनालाई साढे चार लाख रुपैयाँ घुससहित रंगेहात पक्राउ गरिएको छ।

अख्तियार दुरुपयोग अनुसन्धान आयोगको केन्द्रीय कार्यालय टंगाल र बर्दिबास कार्यालयको संयुक्त टोलीले वडाध्यक्ष ५७ वर्षीय उपेन्द्र सहनी, वडा सचिव ५२ वर्षीय उपेन्द्र साह र ४५ वर्षीय विजय मण्डललाई घुस रकमसहित पक्राउ गरेको हो।

उनीहरुलाई आज दिउँसो वडा कार्यालय परिसरबाट सेवाग्राहीबाट लिएको ४ लाख ५० हजार रुपैयाँ घुस रकमसहित नियन्त्रणमा लिइएको अख्तियारका बर्दिबास कार्यालय प्रमुख रामबहादुर कुरुम्वाङले जानकारी दिए । उनका अनुसार, वडाध्यक्ष र सचिवले घरबाटो प्रमाणित गर्ने कार्यको लागि उक्त घुस रकम मागेको सूचनाका आधारमा टोलीले उनीहरुलाई रकमसहित पक्राउ गरी थप अनुसन्धान गरिरहेको छ।