काठमाडौँ 
कार्तिक ८ गते,
चितवनका प्रमुख जिल्ला अधिकारी इन्द्रदेव यादव र एसपी भावेश रिमालको सरूवा भएको छ ।
बुधवार गृहमन्त्री स्तरीय निर्णय गरी सिडिओ यादवलाई हटाएर प्रकाश पौडेललाई खटाइएको हो । त्यस्तै रिमालको ठाउँमा मानव बेचबिखन अनुसन्धान ब्युरोमा रहेका गौतम मिश्रलाई पठाइएको छ । 
स्रोतका अनुसार चितवनमा प्रधानमन्त्री केपी शर्मा ओलीको पुत्ला प्रदर्शन र दहन हुँदा प्रशासनले हस्तक्षेप नगरेको भन्दै गृह मन्त्रालयले उनीहरूको सरूवा गरेको हो ।
राष्ट्रिय स्वतन्त्र पार्टी (रास्वपा) ले चितवनमा प्रधानमन्त्री ओलीको पुत्ला बनाएर प्रदर्शन गरेको भिडिओ सामाजिक सञ्जालमा बाहिरिएको थियो ।
'उक्त भिडिओ बाहिरिएसँगै सुरक्षा निकायले त्यसलाई नरोकेको भन्दै गृहले दुवैको सरूवा गरेको हो,'स्रोतले भन्यो ।
यादव र रिमाल दुवै जना चितवनबाट बिहीबारै हिँड्ने तयारीमा रहेको स्रोतको भनाइ छ । यादव गृह मन्त्रालय र रिमाल मानव बेचबिखन अनुसन्धान ब्युरोमा आउने पनि स्रोतले बतायो ।