काठमाडाैं । पर्साको बहुदरमाई नगरपालिकाले भर्खर नगरसभा गरेर आर्थिक वर्ष २०८१/०८२ काे नीति तथा कार्यक्रम पारित गरेकाे छ ।

सहमति जुटाउन निक्कै कठिनाई भइरहेकाे उक्त पालिकाले नीति तथा कार्यक्रम पारित गर्दा एउटा वडाकाे याेजना समावेश नै गरेकाे छैन । ९ वटा वडा रहेकाे उक्त पालिकामा वडा नम्बर ६ ले बजेटका लागि याेजनाहरु पठाउन सकेकाे छैन् ।

उपप्रमुख सुष्माकुमारी कुसवाह नगर प्रमुख (मेयर) सिंहासन साह तेलीको ढिलासुस्ती र निर्णय प्रक्रियामा अवरोधका कारण बजेट ल्याउन नसकिएकाे दाबी गर्छिन् ।उता मेयर भने काम गर्दा गर्दै ढिलाे भएकाे जिकिर गर्छन् ।

पालिकाले बजेट पारित गर्न नसक्दा याे आर्थिक वर्षको साउनदेखि अहिलेसम्म कर्मचारीहरुले तलब पाएका छैनन् भने लाभग्राही नागरिकहरुले सामाजिक सुरक्षाभत्ता पाएका छैनन् । तलब र भत्ता वितरण रोकिएपछि विशेष गरी मधेसको महत्त्वपूर्ण पर्व छठको समय कर्मचारीहरूलाई आर्थिक कठिनाइ भएकाे छ ।

असारमै पारित हुनुपर्ने बजेट कात्तिक ८ मा मात्र नगर सभाबाट पारित भयो । अहिले प्रमुख प्रशासकीय अधिकृतलाई मेयरले खर्चको अख्तियारी नदिएकाले छठमा तलब र भत्ताको निकासा राेकिएकाे उपमेयर कुसवाहले दाबी गरिन् ।

लामो समयदेखि तलब नपाउँदा शिक्षकहरूले चाडपर्वको बेला घर खर्च चलाउन गाह्रो भएको बताएका छन् । कर्मचारीहरुलाई पनि दैनिकी चलाउन गार्हाे भएकाे छ ।

उता एक वडाले याेजनाहरु नपठाइकन नगरले नीति तथा कार्यक्रम पारित गरेकाे पालिकाले फेरि नगरसभा गर्नुपर्ने हाे कि भन्ने आशंका पनि उब्जिएकाे छ । प्रमुख प्रशासकीय अधिकृत महमद शेरे मुस्तफाले भने त्यस्ताे अवस्था आएमा पालिका अझ जटिल समस्यामा पुग्ने बताउँछन् । उनले त्यस्ताे समस्या सम्भवत नआउने बताए । बजेट पास गर्नै ढिलाे भएकाे र नागरिक तथा कर्मचारी जनप्रतिनिधिसँग रुष्ट भएका कारण त्यस्ताे समस्या सम्भवत नआउने जिकिर  प्रमुख प्रशासकीय अधिकृत मुस्तफाकाे छ ।