सुर्खेत । उपनिर्वाचन भइरहेको दैलेखको महाबु गाउँपालिकामा मतदान जारी छ । अध्यक्ष पदका लागि बिहानै ७ बजेदेखि नै सुरु भएको मतदान जारी छ । ११ बजेसम्म तीनहजार मत खसेको छ ।

जिल्ला निर्वाचन अधिकृतका अनुसार तीन हजार ४४ मत खसिसकेको छ । महाबुमा १२ हजार ६१४ मतदाता रहेका छन् । अहिलेसम्म २४.१३ प्रतिशत मत खसेको हो ।

महाबुको अध्यक्षमा कांग्रेसबाट झलकबहादुर भण्डारी, माओवादीबाट जंगबहादुर बराल मगर, एमालेबाट जंगबहादुर शाही, राष्ट्रिय स्वतन्त्र पार्टी (रास्वपा) बाट प्रकाशकुमार बुढा चुनावी मैदानमा होमिएका छन् । यस्तै राप्रपाबाट सुर्जे रावत र नेमकिपाबाट दुर्गबहादुर मगर पनि चुनावमा होमिएका छन् ।

त्यस्तै दैलेखको दुल्लु नगरपालिका-१३ मा बिहान ११ बजेसम्म ६६६ मत खसेको छ । दुल्लुमा २ हजार ७०६ जना कुल मतदाता रहेको निर्वाचन अधिकृतले  जानकारी दिए ।

मतदान साँझ ५ बजेसम्म जारी रहने छ ।