कैलाली । धनगढी उपमहानगरपालिकाको ‘विशेषज्ञ वडा स्वास्थ्य क्लिनिक’बाट २३ हजार नौ सय ६७ जनाले स्वास्थ्य सेवा लिएका छन् । चालु आर्थिक वर्ष २०८१/८२ को साउनदेखि पुस मसान्तसम्मको ६ महिनाको अवधिमा उक्त उनीहरुले निःशुल्क विशेषज्ञ स्वास्थ्य सेवा लिएका हुन् ।

वडा स्वास्थ्य क्लिनिकबाट १७ हजार ६ सय ८५ महिला र ६ हजार दुई सय ८२ पुरुषले स्वास्थ्य सेवा लिएका उपमहानगरको स्वास्थ्य शाखा प्रमुख योगेश अवस्थीले जानकारी दिए । सो अवधिमा १३ हजार तीन सय ५३ जनाले जनरल फिजिसियनबाट, चार हजार पाँच सय २६ जना महिलाले स्त्री तथा प्रसूति रोग विशेषज्ञबाट र ६ हजार ८८ जनाले आँखाको रोगसम्बन्धी निःशुल्क सेवा लिएका थिए । सेवा लिनेमा चार हजार तीन सय २० जना ७० वर्षभन्दा माथिको उमेर समूहका रहेका छन् ।

स्वास्थ्य क्लिनिकमा बिरामीको निःशुल्क जाँचसँगै निःशुल्क औषधि समेत वितरण गरिएको प्रमुख अवस्थीले बताए । आर्थिक रुपमा विपन्न नागरिकलाई विशेषज्ञ स्वास्थ्य सेवा दिने उद्देश्यले वडा स्वास्थ्य क्लिनिक सञ्चालनमा ल्याइएको उनको भनाइ छ । प्रत्येक महिना १९ वटै वडामा सञ्चालन हुने क्लिनिकमा एक जना जनरल फिजिसियन, एक जना स्त्री तथा प्रसूति रोग विशेषज्ञ तथा धनगढी नेत्रालय र गेटा आँखा अस्पतालको सहकार्यमा आँखारोग विशेषज्ञबाट निःशुल्क सेवा प्रदान गरिँदै आएको छ ।

गत आव २०८०/८१ मा विशेषज्ञ वडा स्वास्थ्य क्लिनिकबाट ४७ हजार चार सय ६२ जनाले स्वास्थ्य सेवा लिएका थिए । उपमहानगरपालिकाले गरिब तथा विपन्न नागरिकलाई लक्षित गरेर आव २०७९÷८० को साउनदेखि ‘विशेषज्ञ वडा स्वास्थ्य क्लिनिक’ सञ्चालन गरेको हो ।