बुटवलमा कांग्रेस-माओवादी गठबन्धन जीवन्त रहेको प्रचण्डको भनाइ

मेयरसाप डेस्क

बुटवल । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले बुटवलमा अहिले पनि कांग्रेस र माओवादीबीचको समीकरण जीवन्त रहेको बताएका छन् ।

आइतबार बुटवलमा सहिद स्मृति प्रतिष्ठान रुपन्देहीका संस्थापक अध्यक्ष स्वर्गीय रामप्रसाद बञ्जाडे ‘टंकमणि’को सालिक अनावरण तथा पुस्तक विमोचन कार्यक्रमलाई सम्बोधन गर्दै उनले बुटवल उपमहानगरपालिकाले गरेको सहयोगबाट आफूले सो कुराको अनुभूति गरेको बताए ।

कार्यक्रममा प्रचण्डले जनयुद्धका बेला टंकमणिले सप्लाई विभागमा रहेर १० वर्षे जनयुद्धलाई सफल बनाउन महत्वपूर्ण भूमिका खेलेको स्मरण गरे । 

उनले टंकमणि साहसी योद्धा भएको र जोखिमपूर्ण जिम्मेवारी बहन गरेर काम गरेको भन्दै प्रशंसा गरे ।

त्यस्तै, बुटवल उपमहानगरपालिकाका प्रमुख खेलराज पाण्डेले टंकमणि माओवादीका मात्र नभई समग्र समाजका नेता भएको बताए ।

आफूहरू कांग्रेस–माओवादी गठबन्धनबाट निर्वाचित भएकाले केन्द्रमा गठबन्धन भत्किए पनि पालिकामा गठबन्धनको मर्मअनुसार नै काम गरिरहेको उनले उल्लेख गरे ।