गाउँपालिका महासंघकी अध्यक्ष पाण्डेको घर आगजनी गर्ने थप ४ जना पक्राउ

पक्राउ पर्नेमा नेपाली कांग्रेससम्बद्ध तरुण दलका क्षेत्रीय सभापति पनि

मेयरसाप डेस्क

काठमाडौं। पूर्वी नवलपरासीको हुप्सेकोट गाउँपालिकाकी अध्यक्ष लक्ष्मी पाण्डेको घरमा तोडफोड तथा आगजनी गरेको आरोपमा थप चार जना पक्राउ परेका छन् ।  गाउँपालिका महासंघको अध्यक्ष समेत रहेकी पाण्डेको घरमा आगजनी गरेको आरोपमा शनिबार बिहान प्रहरीले थप ४ जनालाई पक्राउ गरेको हो ।

पक्राउ पर्नेमा कावासोती नगरपालिका–८ का तरुण दलका क्षेत्रीय सभापति अमित गिरी, अविनाश काफ्ले, कुमार पुलामी र हुप्सेकोट गाउँपालिका–१ का कमल खनाल रहेको जिल्ला प्रहरी कार्यालय पूर्वी नवलपरासीले जनाएको छ ।

अध्यक्ष पाण्डेलगायत जनप्रतिनिधिहरूले दर्ता गराएको किटानी जाहेरीको आधारमा जिल्ला प्रहरीले उनीहरुलाई पक्राउ गरेको हो ।

कावासोतीका गिरी नेपाली कांग्रेससम्बद्ध तरुण दलका क्षेत्रीय सभापति हुन् । पालिका अध्यक्ष पाण्डे पनि कांग्रेसबाट दोस्रोपटक निर्वाचित पालिका अध्यक्ष हुन् । 

यसअघि प्रहरीले हुप्सेकोट प्रहरी चौकीमा आगजनी र तोडफोडमा संलग्न रहेको आशंकामा सात जनालाई पक्राउ गरिएको थियो।