रामपुरमा भलिबल प्रतियोगिता हुँदै, विजेतालाई २ लाख पुरस्कार

दोस्रो पटक क्लबस्तरीय भलिबल

मेयरसाप डेस्क

पाल्पा । पाल्पाको रामपुर नगरपालिका, भम्बकमा भम्बक युनाइटेड यूथ क्लबले दोस्रो पटक क्लबस्तरीय आमन्त्रित भलिबल प्रतियोगिता आयोजना गर्ने भएको छ ।

युवालाई खेलकुदप्रति आकर्षित गर्दै भलिबलको उत्थान गर्न यो प्रतियोगिता मङ्सिर २० गतेसम्म सञ्चालन हुनेछ ।

प्रतियोगिताको विजेताले नगद २ लाख रुपैयाँ, उपविजेताले १ लाख, तेस्रो हुनेले ५० हजार र सान्त्वना स्थान हासिल गर्ने टोलीले ३० हजार रुपैयाँसहित ट्रफी, मेडल र प्रमाणपत्र प्राप्त गर्नेछन् ।

उत्कृष्ट खेलाडीलाई नगद १० हजार रुपैयाँ र विधागत उत्कृष्ट (स्पाइकर, लिब्रो, सेटर, सर्भर, मिड ब्लकर) लाई जनही ५–५ हजार रुपैयाँ पुरस्कार प्रदान गरिनेछ ।

प्रतियोगितामा जिल्ला भलिबल सङ्घ पाल्पा, सशस्त्र प्रहरी बल (एपिएफ) कास्की, जिल्ला भलिबल सङ्घ नवलपुर, होराइजन भलिबल क्लब रूपन्देही, मणिमुकुन्द भलिबल क्लब रूपन्देही र जिल्ला भलिबल सङ्घ स्याङ्जा लगायतका टोलीको सहभागिता रहने खेल संयोजक अनुप मल्लले जानकारी दिए ।

प्रतियोगितामा राष्ट्रिय तथा अन्तर्राष्ट्रियस्तरमा खेलिसकेका खेलाडीहरूको पनि सहभागिता रहने आयोजकले जनाएको छ ।