जैमिनी नगरपालिकाको सल्यानधारा सडक सञ्जालबाट वञ्चित

सामान बोकेरै लैजानुपर्ने बाध्यता

मेयरसाप डेस्क

ढोरपाटन । जैमिनी नगरपालिका–८, सल्यानधारा गाउँमा छिमेकी गाउँहरूमा मोटरबाटो पुगेको वर्षौं भइसक्दा पनि अहिलेसम्म सडक पुग्न सकेको छैन । केवैखानी गाउँ र सल्यानधाराको बीचमा रहेको ठूलो भिर र चट्टानसहितको पहरा सडक विस्तारमा मुख्य बाधक बनेको छ ।

नगरपालिकाले सल्यानधारालाई सडक सञ्जालमा जोड्न दुईतर्फी (केवैखानी र वाइनकुना) बाट सडक निर्माण गरिरहेको छ । उपप्रमुख हरिहर शर्माका अनुसार केवैखानी हुँदै जोड्न अब करिब १०० मिटर मात्र बाँकी छ भने वाइनकुनाबाट डेढ किलोमिटर सडक निर्माण गर्नुपर्नेछ ।

निकै अप्ठ्यारो भूगोलका कारण सल्यानधारालाई सडकले जोड्न हालसम्म रु दुई करोड बढी बजेट खर्च भइसकेको छ । यस वर्ष पनि रु छ लाख बजेटले पहरा फोड्ने काम भइरहेको छ ।

स्थानीय डोल्मा गाहामगरले सडक नहुँदा यात्रा, नुन, तेल, चामलजस्ता दैनिक उपभोग्य सामान ढुवानीमा ठूलो समस्या भोग्नुपरेको बताइन् । यहाँका करिब २५ परिवार गाडी चढ्नका लागि ४५ मिनेट टाढा रहेको केवैखानी गाउँ पुग्नुपर्ने बाध्यता छ ।

उपप्रमुख शर्माले थप बजेट व्यवस्थापन भए यसै आर्थिक वर्षभित्र सल्यानधारामा सडक पु¥याउने लक्ष्य रहेको बताए । स्थानीयहरूले भने भौगोलिक विकटताका कारण पछाडि परेको भन्दै राज्यले यस्ता दुर्गम ठाउँलाई प्राथमिकतामा राख्नुपर्ने माग गरेका छन् ।